Marg‘ilonda Cobalt bilan to‘qnashgan Damas haydovchisi mashina ichida yonib ketdi

Ichki ishlar vazirligining Yo‘l harakati xavfsizligi bosh boshqarmasi Farg‘ona viloyati Marg‘ilon shahrida Damas va Cobalt rusumli avtomobillar to‘qnashuvi bo‘yicha ma’lumot berdi.

«2021 yil 14 dekabr kuni soat 20:00larda, Farg‘ona viloyati, Marg‘ilon shahar, Ahmad Yassaviy ko‘chasida joylashgan «Yog‘du» qahvaxonasi ro‘parasida haydovchi, 1991 yilda tug‘ilgan R.X. Damas rusumli avtomobilni boshqarayotib, chapga burilish vaqtida ro‘paradan kelayotgan haydovchi, 2000 yilda tug‘ilgan A.A. boshqaruvida bo‘lgan Cobalt rusumli avtomobilni o‘tkazib yubormaganligi oqibatida to‘qnashuv sodir bo‘lgan.

Zarb oqibatida Damas avtomobilida yong‘in yuzaga kelgan. Yong‘in o‘t o‘chiruvchilar tomonidan bartaraf etilgan.

Hodisa natijasida Damas rusumli avtomobil haydovchisi R.X. tan jarohatlari bilan voqea joyida vafot etgan», deyiladi xabarda.

Mazkur YTH yuzasidan Marg‘ilon shahar IIB TB tomonidan dastlabki tergovoldi surishtiruv harakatlari olib borilmoqda.