«Qo‘yliq bozorini ko‘chirish bosqichma-bosqich amalga oshiriladi» – Bektemir tumani hokimi

Toshkentdagi Qo‘yliq dehqon bozori bosqichma-bosqich ko‘chiriladi. Bu haqda Bektemir tumani hokimi Tapil Mahamadziyoyev ma’lum qildi.

«Bozor ko‘chirilishi bosqichma-bosqich amalga oshiriladi. Kadastri borlarga davlat tomonidan 100 foiz kompensatsiya to‘lab beriladi, albatta.

Bozorning ko‘chishi narx-navoga ta’sir qilmaydi. Chunki yangi bozorda reklama monitorlari mavjud va bir aylantirishi 100 mln so‘m turadi. Bu bozorga qo‘shimcha daromad keltiradi.

Biz yangi bozor ma’muriyati bilan 3 oy patta puli olmaslik sharti bilan kelishdik. 3 oy davomida hech qanaqa patent puli to‘lamasdan tadbirkorlarni qabul qiladi.

O‘shangacha narx-navoda biroz o‘zgarishlar bo‘lishi mumkin. Bozorni bosqichma-bosqich ko‘chirmasak bo‘lmaydi», degan Tapil Mahamadziyoyev 13 dekabr kuni tuman deputatlari bilan uchrashuvda.

U bozor ko‘chirilayotgan Food City majmuasi endilikda Bektemir tumani hududida ekanini ta’kidlagan — avgustda Toshkent viloyati O‘rta Chirchiq tumanining bir qismi Bektemir tumani hududiga o‘tgandi.

7 dekabr kuni Toshkent shahar hokimining Qo‘yliq dehqon bozori va unga tutash ulgurji savdo maydoni boshqa manzilga ko‘chirilishi haqidagi qarori e’lon qilindi. Bu qaror bozorda faoliyat ko‘rsatuvchi tadbirkorlar va boshqa xizmatchilarda norozilik uyg‘otdi. Bozorchilar ko‘chish oqibatida zarar ko‘rishlari mumkinligi, narx-navo ko‘tarilishi kabi salbiy oqibatlar haqida gapirishdi.

Shundan so‘ng bozor buzilishidan norozi bo‘lgan bir guruh sotuvchilar bozor yonidan o‘tuvchi Toshkent kichik halqa yo‘lini to‘sishga urindi, keyinroq ularning 5 nafari qamoqqa olindi. Holat yuzasidan Ma’muriy kodeksning 195- hamda 201-moddalari bo‘yicha ish ochilgan.

Qo‘yliq bozoridagi tadbirkorlarga 31 dekabrgacha bozordagi faoliyatini tugatishi, 1 yanvardan Food City hududiga ko‘chish haqidagi ogohlantirish xatlariga imzo chektirish holatlari boshlangani haqida xabar berildi. Ogohlantirish xatida agar tadbirkorlar tomonidan bu talablar bajarilmasa, ma’muriy va hatto jinoiy javobgarlikka tortilishi mumkinligi haqida aytilgan edi.

14 dekabr kuni Qo‘yliq dehqon bozori ma’muriyati vakili Qodirjon Normirzayev bozor buzilishi yoki ko‘chishi haqida hech qanday rasmiy topshiriq berilmaganini va sotuvchilarni javobgarlikka tortish bo‘yicha ogohlantirish xati kim tomonidan berilganidan ma’muriyat bexabarligini aytdi. Bektemir tumani hokimining so‘zlari esa buni rad etadi.

Ayni paytda bozor faoliyati davom etmoqda.