Xorazm viloyati hokimi: «Budjetning 65 foizi aholini ijtimoiy qo‘llab-quvvatlashga yo‘naltiriladi» 

Dastlab viloyat rahbari muhim iqtisodiy ko‘rsatkichlarga to‘xtaldi. 

«2021 yil yakuni bilan viloyatda yalpi hududiy mahsulot hajmi 30 trillion so‘m bo‘lishi (reja 121,9 foizga bajarilishi), aholi jon boshiga yalpi hududiy mahsulot 15,7 million so‘mni tashkil qilishi kutilmoqda.  

Viloyat budjeti daromadi 1,44 trillion so‘m bo‘lishi rejalashtirilgan edi. Uning 1,73 trillion so‘mga (120 foizga) bajarilishi, mahalliy budjetga 350 milliard so‘m qo‘shimcha mablag‘ tushishi kutilyapti». 

Farhod Ermanov budjet mablag‘larining sarflanishida asosiy urg‘u ijtimoiy sohaga qaratilganini ma’lum qildi.

«Jamoatchilik fikri asosida shakllangan tadbirlarni moliyalashtirishga 18 milliard so‘m, ijtimoiy soha muassasalarida qurilish-ta’mirlash ishlariga 34 milliard so‘m, ko‘p qavatli uy-joylarni ta’mirlash uchun 7 milliard so‘m, ichki yo‘llarni ta’mirlashga 60 milliard so‘m mablag‘ ajratildi. 

2021 yilgi budjet xarajatlarining 65 foizi ijtimoiy soha va aholini ijtimoiy qo‘llab-quvvatlashga yo‘naltirildi. Ijtimoiy himoyaga muhtoj, kam ta’minlangan oilalarni qo‘llab-quvvatlash uchun nafaqalar va moddiy yordam to‘lovlariga o‘tgan yilga nisbatan 2 barobar ko‘p mablag‘ ajratildi».  

2022 yilda mahalliy budjet daromadlari oshiriladi va aholi yashash sharoitlarini tubdan yaxshilashga yo‘naltiriladi.  

«2022 yil yakuni bilan aholi jon boshiga to‘g‘ri keladigan yalpi hududiy mahsulot miqdori 16,6 million so‘mga, mahalliy budjet daromadlari 2,2 trillion so‘mga yetkaziladi. Daromadlar rejasini 505 milliard so‘m ortiqcha bajarish choralari ko‘riladi. Ushbu mablag‘lar mahallalarda aholining yashash sharoitlarini tubdan yaxshilashga yo‘naltiriladi» 

Viloyat rahbari Xorazmni kelgusi 5 yillikda ijtimoiy-iqtisodiy rivojlantirish dasturi ishlab chiqilgani, 6 ta yo‘nalishda shahar va tumanlarni rivojlantirish bo‘yicha «yo‘l xaritasi» tayyorlanganini ma’lum qildi.  

«2022 yilda ijrosini ta’minlash bo‘yicha ishlab chiqilgan «yo‘l xaritasi»ga asosan rejalar quyidagicha: 

Birinchi yo‘nalish - ishsizlik va kambag‘allikni qisqartirish, aholi daromadlarini oshirish maqsadida 91,9 ming nafar aholi bandligini ta’minlash choralari ko‘riladi. Jumladan, tadbirkorlikni keng joriy etish orqali 18 mingta, hunarmandchilik yo‘nalishida 3 mingta, xizmatlar sohasida 45 mingta yangi ish o‘rni yaratiladi. 

Ikkinchi yo‘nalish – kelgusi besh yilda viloyatda 5 milliard dollarlik investitsiya loyihalarini amalga oshirish orqali, 70 mingdan ziyod doimiy ish o‘rinlari yaratiladi. 2022 yilda esa qiymati 5,9 trillion so‘m bo‘lgan 631 ta loyihani amalga oshirish rejalashtirilgan. 632 milliard so‘mlik

19 ta yirik loyiha foydalanishga topshirilib, 4 940 ta yangi ish o‘rinlari yaratiladi.  

Uchinchi yo‘nalish – qishloq xo‘jaligi samaradorligini oshirish orqali 50 ming aholi uchun doimiy ish o‘rni yaratiladi. Bu borada, avvalo, suv ta’minoti va yerlarning meliorativ holatini yaxshilash bo‘yicha loyihalarni davom ettiriladi. 49,5 ming gektarda suv tejovchi texnologiyalar joriy qilinadi. 400 gektar yerda zamonaviy issiqxonalar va 1 ta yirik agrologistika markazi ishga tushiriladi. 

To‘rtinchi yo‘nalish – aholi va tadbirkorlik uchun qulay infratuzilma yaratish. «Obod qishloq» va «Obod mahalla» dasturlari uchun 340,7 milliard so‘m mablag‘ ajratiladi. Aholini elektr, tabiiy gaz va ichimlik suvi ta’minotini yaxshilashga e’tibor qaratiladi. Markazlashgan ichimlik suvi bilan ta’minlanganlik darajasi 83,5 foizdan 86,2 foizga yetkaziladi.  

Beshinchi yo‘nalish – ekologiya va aholi salomatligi. Birlamchi tibbiyot bo‘g‘inida aholiga ko‘rsatiladigan tibbiy xizmat turlarini ko‘paytirish va sifatini oshirish choralari ko‘riladi. Mahallarga biriktirilgan «tibbiyot brigadalari» va oilaviy poliklinikalarni surunkali kasalliklarni barvaqt aniqlash bo‘yicha zarur vositalar bilan ta’minlash uchun 2,4 milliard so‘m ajratiladi.  

Oltinchi yo‘nalish – ta’lim sifatini oshirish bo‘yicha aniq choralar ko‘riladi. 2022 yilda 3-7 yoshdagi bolalarni maktabgacha ta’lim tashkilotlari bilan qamrab olish darajasi 74 foizga yetkaziladi. Ushbu maqsadlarga 89 milliard so‘m sarflanadi. 1 yanvardan boshlab umumta’lim maktablarida 1-4 sinf o‘quvchilari uchun bepul tushlik yo‘lga qo‘yiladi. Ushbu maqsadlarga 100 milliard so‘m ajratiladi. 2 ta yangi maktab quriladi, 10 ta maktab rekonstruksiya qilinadi, 7 ta maktab mukammal ta’mirlanadi. Ushbu tadbirlarga 93,3 milliard so‘m mablag‘ sarflanadi».