Ruslanbek Davletov to‘g‘ridan to‘g‘ri yer ajratish va tendersiz xaridlarni qoraladi

O‘zbekiston adliya vaziri Ruslanbek Davletov 7 fevral kuni hisobot press-konferensiyasini tashkil etdi. Unda vazir, xususan, tender va yer ajratish masalalarida Adliya vazirligiga bo‘ladigan noqonuniy iltimoslar haqida so‘zlab berdi.

Davletoning aytishicha, yer ajratish va tender bo‘yicha qonunchilikni chetlab o‘tishni nazarda tutadigan loyihalar vazirlikka huquqiy ekspertizadan o‘tkazish uchun tez-tez kelib turadi.

“To‘g‘ridan to‘g‘ri yer ajratish va tendersiz savdolarni o‘tkazish to‘g‘risidagi loyihalar ham bizga juda ko‘p keladi. Bu narsalardan endi voz kechish kerak. O‘zbekiston juda katta ochiqlik qilyapti. Prezidentimiz korrupsiyaga qarshi qancha kuyib-pishayotganini ko‘ryapsizlar. Lekin loyihalarda “Vaqtimiz yetmayapti, shuni tendersiz qilaylik, to‘g‘ridan to‘g‘ri qandaydir MChJni belgilaylik, loyihachini belgilaylik”, (degan iltimoslar) juda ko‘p.

To‘g‘ri, bu qonun bo‘yicha mumkin. Vazirlar Mahkamasining qarori bilan yagona sotib oluvchi bo‘yicha mumkin. Lekin bu istisno deyilgan. Agar istisno bo‘yicha holatlar ko‘payaversa, u asosiy qoidaga aylanib ketadi. Uning istisnoligi ham qolmaydi”, – deydi Ruslanbek Davletov.

Adliya vaziriga ko‘ra, tendersiz amalga oshiriladigan qurilishlar kamiga 30 foizga qimmatga tushadi.

“Tender savdolarisiz” degani – bu qurilish kamida 30 foizga qimmat degani. Yoki “loyiha-smeta hujjatisiz parallel qilaylik” degani xalq pulidan ketadigan qurilish 30 foizga qimmatladi, degani. Bu yerda natija bo‘lmaydi. Sifati ham zo‘r bo‘lmaydi. Biz xalq pulini olayotgandan keyin birinchi – sifat, ikkinchi – muddat, uchinchi – narx bo‘lishi kerak. Bu narsalarning birortasi aytilayotgan holatlarda uchramaydi”, – deydi vazir.

Ma’lumot uchun, yer munosabatlarida tenglik va shaffoflikni ta’minlash bo‘yicha farmonga asosan faqat Vazirlar Mahkamasi bir qator holatlarda yer uchastkalarini to‘g‘ridan to‘g‘ri ijaraga berishga haqli.

Eslatib o‘tamiz, adliya vaziri kuni kecha Senat yalpi majlisida Toshkent viloyati hokimining 2021 yil oktyabridagi qarori bilan Nurafshon shahridagi 781 gektar yer tadbirkorlik sub’yektiga auksionsiz ajratib berilganini tanqid qilib, qarorni bekor qilish bo‘yicha sudga ariza kiritilganini ma’lum qilgandi.