«Avtoyo‘l»ning yo‘l belgilarini ishlab chiqishdagi monopoliyasi bekor qilinadi 

Yig‘ilishda yo‘l harakati vositalari sohasidagi ishlarni moliyalashtirish uchun YHXB tizimida “Xavfsiz yo‘l va xavfsiz piyoda” respublika va viloyat jamg‘armalari tashkil etilishi ma’lum qilindi. Jamg‘armalar har yili kamida 400 milliard so‘m tushadigan aniq manbalarga ega bo‘ladi. Shuningdek, bunga mahalliy budjetlardan ham mablag‘ ajratiladi.

Davlat rahbari misol tariqasida Farg‘ona viloyati tajribasini ko‘rsatib o‘tdi.  Viloyat budjetidan 24 milliard so‘m ajratilib, 125 kilometr yo‘llarga yoritkich va nur qaytaruvchi vositalar, 24 ta piyoda yo‘laklariga svetofor, 107 tasiga “sun’iy do‘ngliklar” o‘rnatilgan. Natijada, viloyatda umumiy avariyalar 31 foizga, o‘lim bilan bog‘liq holatlar 21 foizga, piyodalar ishtirokidagi hodisalar 37 foizga kamaygan. 

Viloyat, tuman va shahar hokimlariga ichki ishlar boshliqlari bilan birga muammoli joylar, “avariya o‘choqlari”dan kelib chiqib, ularni bartaraf etish bo‘yicha oylik va choraklik manzilli dasturlarni ishlab chiqish vazifasi qo‘yildi.

Bundan tashqari, yo‘l belgilarini ishlab chiqishda “Avtoyo‘l”ning monopoliyasi bekor qilinadi va ushbu sohaga tadbirkorlik sub’yektlari jalb etiladi.