Navoiyda bobo va nabira eskalatordan qulab tushdi

Navoiy shahridagi “Yangi hayot” savdo majmuasida nabirasini aylantirgani olib borgan bobo ehtiyotsizlik qilib, eskalatorning yuqori qismidan nabirasi bilan birga qulab tushdi. Bobo voqea joyida vafot etgan.

Videodan kadr

Navoiy viloyati IIB axborot xizmatining Kun.uz’ga ma’lum qilishicha, voqea 18 fevral kuni soat 20:30larda sodir bo‘lgan. Karmana tumanida yashovchi, 1969 yilda tug‘ilgan Sh.T. 3 yoshli nabirasi bilan Navoiy shahridagi “Yangi hayot” savdo majmuasiga borgan. Nabirasini ko‘tarib olgan bobo 5- va 4-qavat oralig‘idagi eskalatorda muvozanatni yo‘qotib, 1-qavatga tushib ketgan hamda voqea joyida vafot etgan. Tan jarohati olgan nabira esa shifoxonaga yotqizilgan.

Holat yuzasidan Navoiy shahar IIB huzuridagi Tergov bo‘limi tomonidan tergovga qadar tekshiruv harakatlari olib borilmoqda.