O‘zbekistonning oltin-valuta zaxiralari kamaydi

Markaziy bank O‘zbekistonning xalqaro zaxiralari to‘g‘risidagi ma’lumotlarni e’lon qildi.

2022 yilning 1 fevral holatiga ko‘ra, O‘zbekistonning oltin-valuta zaxiralari 34,42 mlrd dollarni tashkil qilgan. Taqqoslash uchun, bu ko‘rsatkich 2022 yil 1 yanvar holatiga ko‘ra, 35,13 mlrd dollar bo‘lgan. Raqamlar o‘tgan bir oyda O‘zbekistonning rasmiy zaxiralari qariyb 714 mln dollarga kamayganini ko‘rsatmoqda.

Yanvar oyi davomida oltinning fizik hajmi o‘zgarmagan – 11,4 mln troya unsiya (taxminan 354,5 tonna). Ammo uning qiymati 20,94 mlrd dollardan 20,77 mlrd dollarga pasaygan.

Eslatib o‘tamiz, 1 unsiya 31,1 grammga to‘g‘ri keladi.

Shuningdek, zaxira aktivlari tarkibidagi xorijiy valuta zaxiralari 13,07 mlrd dollardan 12,54 mlrd dollarga yoki 532 mln dollarga kamaygan.

Zaxiralar mamlakatning «xavfsizlik yostiqchasi» ham hisoblanadi – ular salbiy tashqi shok holatlarda zarbani kamaytiruvchi omil sifatida zarur. Xalqaro tashkilotlarning tavsiyalariga ko‘ra, rivojlanayotgan davlatlar uchun zaxiralar kamida 3 oylik importni qoplashi kerak.