07:41 / 24.02.2022
5740

Rossiya banki «O‘zagroeksportbank»ning 100 foiz ulushini 4 mln dollarga sotib oldi

Davlat aktivlarini boshqarish agentligi “O‘zagroeksportbank” ATB ustav kapitalidagi 100 foiz davlat aksiya paketini “Sovkombank” OAJ (Rossiya) bilan 4 mln AQSh dollariga sotish yuzasidan kelishuvga erishilganini ma’lum qildi.

Foto: davaktiv

Qayd etilishicha, “O‘zagroeksportbank” ATB faoliyati tahlili (due diligence) natijalari va xususiylashtirish bo‘yicha konsultant tavsiyasiga ko‘ra, tijorat banki 100 foiz davlat aksiya paketini yaxlit holda, raqobatga asoslangan ommaviy oshkora sotuv jarayoni orqali amalga oshirdi. Sotish jarayoniga xususiylashtirish bo‘yicha konsultant sifatida “Grant Thornton” va baholash uchun “KPMG” xalqaro kompaniyalari jalb etilgan.

“O‘zagroeksportbank” ATBning ustav kapitalidagi davlat aksiya paketini sotib olish bo‘yicha jami 4 ta talabgordan qiziqish bildirilgan va ulardan takliflar kelib tushgan.

“Kelib tushgan takliflar orasida “Sovkombank” OAJ nomzodi bevosita bank faoliyati bilan shug‘ullanishi, mamlakatimizga xorijiy investitsiya bilan birgalikda chet el banki tajribasi, zamonaviy moliyaviy mahsulotlar va xizmatlarni joriy qilish kabi talablarga javob beradi.

“Sovkombank” tomonidan kelib tushgan taklif bank sohasiga oid qonun va qoidalar talablari, xususiylashtirish bo‘yicha konsultant tavsiyalariga muvofiqligi, shuningdek, “Sovkombank” OAJning “O‘zagroeksportbank” ATBni rivojlantirish rejalari inobatga olinib, “Sovkombank” OAJ ommaviy tanlov g‘olibi deb tan olindi va shu munosabat bilan bitim yuzasidan Davlat aktivlarini boshqarish agentligi hamda mazkur bank o‘rtasida huquqiy majburiyatlarga ega hujjatlar imzolandi”, deyiladi Davlat aktivlarini boshqarish agentligi xabarida.

Ma’lumot uchun, 2021 yil 30 sentyabr holatiga “Sovkombank” aktivlari 1,9 trln rublni, kapitali 224 mlrd rublni tashkil etgan. Rossiyaning 1000 ta aholi punktida joylashgan 2,3 mingdan ortiq bank ofislarida 23 ming xodim mehnat qiladi. 

“O‘zagroeksportbank” ATB 2017 yilda qishloq xo‘jalik mahsulotlarini ishlab chiqaruvchilar uchun qulay shart-sharoitlar yaratish hamda eksport qiluvchilarni moliyaviy qo‘llab-quvvatlash maqsadida tashkil etilgan. 2021 yil yakunlariga ko‘ra, “O‘zagroeksportbank” aktivlari 69 mlrd so‘mdan ko‘proqni tashkil etgan.

Top