Yangilanayotgan G‘afur G‘ulom bog‘i: Toshkent uchun qadrli maskandan reportaj

Aholi qayg‘urganicha bor – so‘nggi yillarda poytaxtdagi bog‘lar va daraxtlarga nisbatan tiyiqsiz harakatlar sodir etilmoqda. Shahar hududidagi yashil hududlar, ko‘llar investitsiya bahonasida turli xususiy firmalarga sotib yuborilayotgani achinarli.

G‘afur G‘ulom nomidagi bog‘ shaharning eng yirik va so‘lim parklaridan biri bo‘lib, bu yerda 2 ta sun’iy ko‘l va minglab daraxtlar bor. Bunday hududlar yirik megapolisning zararli tutun va changlarga to‘la atmosferasini tozalab, shaharga o‘pka vazifasini bajarib beradi. Odamlar shovqin-suron va tutunlardan xoli shunday joylarda dam olishadi, ko‘ngil ochishadi.

Bog‘ning yangi egalari prezidentning Toshkentdagi yashil hududlarni ko‘paytirish borasidagi qaror va farmonlarini amalga tatbiq etishda namuna bo‘la olishlarini ko‘rsatmoqchilar. Buni amalda ko‘rish uchun esa toshkentliklar va poytaxt mehmonlaridan yana biroz kutish so‘ralmoqda.

Ma’lum qilinishicha, bog‘ hududidagi ko‘llar quritilmaydi (Milliy bog‘dagi ayanchli holatga bu yerda yo‘l qo‘yilmaydi), aksincha, dam olish uchun yanada qulay holatga keltiriladi. Xalq orasida “bublik – teshikkulcha” nomi bilan tanilgan ko‘l va uning o‘rtasidagi orolcha faqatgina sokinlikni xush ko‘radiganlar uchun sayl va sayr hududi bo‘ladi. Bu ko‘lda qayiqlar ham, katamaranlar ham, kafelar ham, attraksionlar ham bo‘lmaydi. Faqat daraxtlar, o‘rindiqlar, fonuslar va sakinat! Orolchaga olib boruvchi ikki ko‘prik butkul yangidan qurilmoqda. Ko‘lga o‘rdaklar, oqqushlar, g‘ozlar va boshqa parrandalar qo‘yib yuboriladi.

Ikkinchi ko‘l esa avvalgi maqomiga qaytariladi, ya’ni unda cho‘milish uchun plyaj zonasi, faol dam oluvchilar uchun voleybol, basketbol va sohilda o‘ynash mumkin bo‘lgan boshqa sport turlari uchun maydonchalar barpo etilmoqda. Ko‘lning plyajga qarama-qarshi qirg‘og‘ida amfiteatr qurilmoqda. Bu amfiteatr tribunalari ko‘lga qaragan bo‘lib, tomoshabinlar turli ko‘ngilochar chiqishlarni zumrad ko‘l fonida kuzatishlari mumkin bo‘ladi.

Ko‘rsatuvimiz orqali park hududidagi attraksionlar yangilanayotgani, ular qaysi davlatlardan olib kelinayotgani, xarajatlar miqdori, o‘t o‘chirish gidrantlari, kichik yoshdagi bolalar, o‘smirlar va kattalar uchun mos keladigan har turli tematik attraksionlar va hududlar, yopiq va ochiq interaktiv hududlar, bitta yopiq va 3 ta ochiq bolalar maydonchalari, yangi qurilayotgan tomosha charxpalagi, vorkaut maydonchalari va veloyo‘laklar, alohida hududda joylashtiriladigan fud-zona, daraxtlar va chimlarni sug‘orish uchun tomchilatib va yomg‘irli sug‘orish tizimlari o‘rnatilayotgani, va muhimi, rekonstruksiya davrida daraxtlarga ziyon yetkazilmagani haqida bilib olasiz.

Yoz mavsumida foydalanishga topshirilishi rejalangan bu bog‘ga dam olgani bora olish uchun yana biroz vaqt bor, ungacha esa bizning ko‘rsatuv orqali jarayondan voqif bo‘ling.