IIO tomonidan konvoy harakatlarini amalga oshirishda elektron brasletdan foydalanish joriy etiladi

Vazirlar Mahkamasining “Ichki ishlar organlari tomonidan konvoy harakatlarini amalga oshirishda elektron brasletlardan foydalanishni joriy etish haqida”gi qarori loyihasi e’lon qilindi.

Quyidagilar: ichki ishlar organlari tomonidan konvoy harakatlarini amalga oshirishda elektron brasletlardan foydalanish tartibi to‘g‘risidagi nizom; ichki ishlar organlari bo‘linmalarini elektron brasletlar bilan ta’minlash bo‘yicha dastur tasdiqlanadi.

Ichki ishlar vazirligi:

• manfaatdor vazirlik va idoralar bilan birgalikda ichki ishlar organlari tomonidan konvoy harakatlarini amalga oshirishda foydalaniladigan elektron brasletlar bo‘yicha texnik topshiriqni ishlab chiqadi va tasdiqlaydi;
• 2023 yil yakuniga qadar ichki ishlar organlarining konvoy bo‘linmalari belgilangan dasturga muvofiq elektron brasletlar bilan to‘liq ta’minlanadi;
• ichki ishlar organlarining konvoy bo‘linmalari uchun elektron brasletlarni xarid qilish bilan bog‘liq sarf-xarajatlarni Ichki ishlar vazirligining budjetdan tashqari mablag‘lari hisobidan amalga oshiriladi.

Nizom jinoyat sodir etganlikda gumon qilinib ushlab turilgan, o‘ziga nisbatan qamoqqa olish tarzidagi ehtiyot chorasi qo‘llanilgan shaxslar hamda mahkumlar bilan konvoy harakatlarini amalga oshirishda ular ustidan nazoratni kuchaytirish uchun ichki ishlar organlari tomonidan elektron brasletlardan foydalanish tartibini belgilaydi.

Quyidagilar konvoy harakatlarini amalga oshirish uchun asos hisoblanadi:

• sud va surishtiruv va tergov organlarining talabnomalari;
• sud ajrimi (hukmi);
• ichki ishlar organlarining vaqtincha saqlash hibsxonalari hamda tergov hibsxonalarida saqlanayotgan shaxslarni va jazoni ijro etish koloniyalarida jazo muddatini o‘tayotgan mahkumlarni tibbiyot muassasasiga joylashtirish yoki tibbiy muassasasida tekshiruvdan o‘tkazish lozimligi to‘g‘risidagi tibbiyot xodimining ma’lumotnomasi.

Elektron brasletlar bilan Ichki ishlar vazirligi Qorovul qo‘shinlari, ichki ishlar organlarining konvoy bo‘linmalari, vaqtincha saqlash hibsxonalari, tergov hibsxonalari va jazoni ijro etish koloniyalari ta’minlanadi.

Elektron brasletlardan faqatgina konvoy qilinuvchilar bilan barcha konvoy harakatlarini amalga oshirish jarayonida, shuningdek ichki ishlar organlarining vaqtincha saqlash hibsxonalari hamda tergov hibsxonalarida saqlanayotgan shaxslarning va jazoni ijro etish koloniyalarida jazo muddatini o‘tayotgan mahkumlarning sog‘liqni saqlash tizimidagi tibbiyot muassasalarida statsionar davolanishi yoki tibbiyot muassasasida tibbiy tekshiruvdan o‘tkazish davrida ular ustidan to‘liq nazorat o‘rnatish maqsadida foydalaniladi.