Endi o‘qituvchilarga toifa sertifikatlari elektron beriladi

2021 yilgi hukumat qarorida pedagoglarga qog‘oz shakldagi attestatsiyadan o‘tganlik to‘g‘risidagi sertifikat berish amaliyoti bekor qilinib, elektron raqamli imzo bilan tasdiqlangan va QR-kod qo‘yilgan elektron shakldagi sertifikat berish tartibi belgilangan. 

Attestatsiyadan o‘tganlik sertifikatiga asosan, o‘qituvchilarga toifalar beriladi va bu ularning oylik maoshiga ta’sir qiladi.    

“Elektron sertifikatlarning dastlabkilari faoliyati davomida yutuqlarga erishgan, malaka toifasini attestatsiyadan o‘tkazilmasdan to‘g‘ridan to‘g‘ri qo‘lga kiritgan pedagoglarga tarqatildi”, deb xabar berdi Ta’lim inspeksiyasi.

Endi faoliyati davomida yutuqlarga erishgan quyidagi o‘qituvchilar attestatsiyasiz ham toifa olishlari mumkin:

• tuman (shahar) miqyosidagi sport musobaqalarining birinchi o‘rin sovrindorlarini tayyorlagan ta’lim tashkilotlari jismoniy tarbiya fani o‘qituvchilariga — ikkinchi malaka toifasi (katta o‘qituvchi lavozimi);
• Qoraqalpog‘iston Respublikasi, viloyatlar va Toshkent shahri miqyosidagi sport musobaqalarining birinchi o‘rin sovrindorlarini tayyorlagan ta’lim tashkilotlari jismoniy tarbiya fani o‘qituvchilariga — birinchi malaka toifasi (yetakchi o‘qituvchi lavozimi);
• xalqaro hamda respublika miqyosidagi sport musobaqalarining birinchi, ikkinchi va uchinchi o‘rin sovrindorlarini tayyorlagan ta’lim tashkilotlari jismoniy tarbiya fani o‘qituvchilariga — oliy malaka toifasi (bosh o‘qituvchi lavozimi);
• xalqaro matematika (IMO), fizika (IPhO), kimyo (IChO), biologiya (IBO) informatika (IOI) olimpiadalarida oltin, kumush yoki bronza medal (birinchi, ikkinchi va uchinchi o‘rin) sovrindorlarini tayyorlagan ta’lim tashkilotlarining pedagog kadrlariga — oliy malaka toifasi (bosh o‘qituvchi lavozimi) to‘g‘ridan to‘g‘ri (attestatsiyadan o‘tkazilmasdan) beriladi.

Shuningdek, O‘zbekiston Respublikasining davlat mukofotlari bilan taqdirlangan, «Ustoz» milliy mukofoti g‘oliblari, Worldskills musobaqalari sovrindorlarini tayyorlagan yoki respublika miqyosidagi fan olimpiadalari va ko‘rik-tanlovlarda g‘oliblikni qo‘lga kiritgan o‘quvchilarni tayyorlagan pedagoglarning malaka toifasi (lavozimi) hech bir sinovlarsiz bir pog‘onaga oshirilmoqda.

Ta’lim inspeksiyasiga ko‘ra, ilk elektron sertifikatlar www.pedkadr.tdi.uz sayti, davlat xizmatlari markazi yoki yagona davlat interaktiv xizmatlari orqali elektron ko‘rinishda yuklangan bo‘lib, QR-kod qo‘yilgan elektron shakldagi sertifikatlar ularning shaxsiy kabinetlariga yuborildi.

Inspeksiya matbuot kotibi Shavkat Xo‘jaqulovning qo‘shimcha qilishicha, toifa sertifikatlarida qog‘oz shakldan butunlay voz kechildi. Bu – respublikadan tumanlargacha sertifikatlar yetib borish jarayonida uchraydigan korrupsiya holatlari, vaqt yo‘qotish, noqulayliklarning oldi olinishiga sabab bo‘ladi. Bundan tashqari, malakali o‘qituvchilar elektron bazasini shakllantirishga ham yordam beradi.