Buxoroda egizak farzandlarni dunyoga keltirgan ayol tug‘uruqxonada vafot etdi. Prokuratura holatni tekshirmoqda

23 yoshli ayol 9 mart kuni egizak farzandlarni dunyoga keltirgan va ikki kun o‘tib vafot etgan.

Ijtimoiy tarmoqlarda Buxoro shahridagi «Mohi Xossa» tug‘uruqxonasida 23 yoshli ayol vafot etgani to‘g‘risida xabarlar tarqaldi. Bosh prokuratura matbuot xizmati holatga munosabat bildirdi.

Aniqlanishicha, Buxoro shahrida yashagan, 1999 yilda tug‘ilgan ayol 9 mart kuni tug‘ish uchun kasalxonaga kelib, egizak farzandlarni dunyoga keltirganidan ikki kun o‘tib, vafot etgan. Marhumaning o‘limi sabablarini aniqlash maqsadida sudga oid tibbiyot ekspertizasi tayinlangan.

Hozirda Buxoro shahar prokuraturasi tomonidan holat yuzasidan tergovga qadar tekshiruv harakatlari olib borilmoqda.