Prezident: Qo‘l qo‘yish oson, qog‘oz hamma narsani ko‘taradi. Lekin uni bajarish-chi?

Kun.uz muxbiri xabariga ko‘ra, davlat rahbari xususiy shifoxonalar faoliyatiga ham to‘xtaldi.

“Uchrashuvimizga xususiy shifoxonalar vakillarini ham taklif qilganmiz. Bir gapni ta’kidlayman – xususiy shifoxonalarni ham tibbiyotda bir oila deb qabul qilishimiz kerak. Men o‘zim joylarga borganimda davlat tibbiy maskanlari bilan birga xususiy shifoxonalarga ham kiraman. Ularda qanday farq bor deyilsa, hamma maosh yuqoriligini aytadi. Bugun maoshlar masalasiga ham to‘xtalamiz.

Bugun hammangizni bir savol o‘ylantiryapti – qani nima o‘zgararkan? Lekin bir narsani aytay, biz bir-birimizni tushunmasak, hech narsa bo‘lmaydi. Maqsad jonajon vatanimizni, aholimizni qiynayotgan muammolarni birgalikda yechish.

Ammo bu faqat qaror, farmonlar bilan hal bo‘lmaydi. Qo‘l qo‘yish oson, qog‘oz hamma narsani ko‘taradi. Lekin uni bajarish-chi? Bugungi muloqotda ham men sizlardan aynan pastdagi muammolar va ularning yechimi bo‘yicha takliflar kutyapman. Sizlarning yaxshi gaplaringiz bilan odamlarimiz dorisiz ham davolanib ketadi”, dedi prezident yig‘ilganlarga qarata.