14:42 / 20.03.2022
10701
Украина ҳарбийлари РФ Қора денгиз флоти қўмондони ўринбосари ҳалок бўлганини хабар қилди

РФ армияси Қора денгиз флоти қўмондонининг ҳарбий-сиёсий масалалар бўйича ўринбосари, 1-рангдаги капитан (муқобили полковник) Андрей Палий Украинадаги урушда ҳалок бўлган. Бу ҳақда Украина қуролли кучлари матбуот хизмати хабар берди.

Аввалроқ Палийнинг ўлими ҳақида Украинадаги қатор нашрлар «Содействие» консалтинг гуруҳи президенти Константин Царенконинг «ВКонтакте»даги постига асосланиб хабар тарқатган. Ҳозирда пост ўчириб юборилган, аммо ОАВда ундан олинган скриншот сақланган.

Кейинроқ Қримдаги Севастополь шаҳри мэри Михаил Развожаев ва севастополлик сенатор Екатерина Алтабаева Палийнинг ўлимини тасдиқлашди. Уларнинг маълумотига кўра, Андрей Палий Мариупол атрофидаги жангда ҳалок бўлган.

Украина қуролли кучларининг 19 март кунги маълумотларига кўра, Украинадаги уруш бошланганидан буён Россиянинг шахсий таркибдаги йўқотишлари тахминан 14,4 минг кишини ташкил этади. Украина ҳукумати россиялик генералларнинг камида беш нафари уруш ҳаракатлари қурбонига айланганини маълум қилган.

  • Капитан Андрей Палий — келиб чиқишига кўра украин, Киевда туғилган, 1990-йиллар бошидан Россия Федерацияси ҳарбий-денгиз кучлари флотида хизмат қилган. Украиналик журналистлар маълумотларига кўра, Палий 1993 йилда Украина учун қасамёд қилишдан бош тортган ва Россия шимолий флотида хизмат қила бошлаган. 2021 йилда Қримдаги нашрлар уни Қора денгиз флоти қўмондонининг ҳарбий-сиёсий масалалар бўйича ўринбосари сифатида келтирган. Палий 2008 йилги урушда Грузия соҳиллари қамал қилинишида ва 2014 йилда Қрим босиб олинишида иштирок этган.
Мавзу
Украина инқирози
2021 йил давомида Россия Украина билан чегарада қўшин тўплади. Сўнгги вақтларда минтақада вазият кескинлашмоқда.
Барчаси
Top