Ekologiya sohasidagi huquqbuzarlik holatlarini foto va videoga olib jo‘natganlarga pul to‘lanadi

Vazirlar Mahkamasining “Davlat ekologik nazoratini amalga oshirish hamda moddiy madaniy meros obektlarini muhofaza qilish va ulardan foydalanish sohasida zamonaviy mexanizmlarni joriy etish chora-tadbirlari to‘g‘risida”gi qarori loyihasi e’lon qilindi.

Davlat ekologiya qo‘mitasi, Bosh prokuratura hamda Turizm vazirligi tomonidan atrof-muhitni va moddiy madaniy meros obektlarini muhofaza qilish va ekologik nazorat sohasida fuqarolarning ishtirokini ta’minlashga qaratilgan “Ekonazorat” va “Madaniy meros nazorati” axborot tizimlari ishlab chiqilgan.

Ekologiya qo‘mitasi:

• ichki ishlar organlari jamoat xavfsizligi xizmati va Milliy gvardiyaning patrullikka jalb etilgan bo‘linmalari va Davlat ekologiya qo‘mitasi davlat inspektorlaridan iborat ekologiya, atrof-muhitni muhofaza qilish va tabiatdan foydalanish sohasidagi huquqbuzarliklarga qarshi kurashish bo‘yicha “Ekologik patrul” ishlash tizimini joriy etish bo‘yicha qo‘shma tadbirlarni ishlab chiqadi;
• 2022 yil 1 apreldan boshlab “Ekologik patrul” ishlash tizimini joriy etish orqali doimiy ravishda ekologiya, atrof-muhitni muhofaza qilish va tabiatdan foydalanish sohasidagi qonunchilik talablari ijrosi so‘zsiz ta’minlanishini nazorat qilishda o‘zaro yaqindan hamkorlikni o‘rnatadi hamda qo‘shma profilaktik tadbirlarni o‘tkazish amaliyotini yo‘lga qo‘yadi;
• aholi o‘rtasida ekologik madaniyatni shakllantirish (shu jumladan, ko‘cha, yo‘lkalar va turar joylarni ozoda saqlash) bo‘yicha targ‘ibot ishlarini olib boradi, davlat nazorati bilan bir qatorda jamoatchilik nazoratini kuchaytiradi;
• Ichki ishlar vazirligi bilan birgalikda Davlat ekologiya qo‘mitasi tizimidagi mavjud avtotransport vositalarini maxsus tovush chiqaruvchi, yorituvchi uskunalar va ajratuvchi belgilari bilan jihozlash choralarini ko‘radi.

Davlat ekologiya qo‘mitasi, Bosh prokuratura hamda Axborot texnologiyalari va kommunikatsiyalarini rivojlantirish vazirligining:

• axborot tizimlarini 2022 yil 1 apreldan boshlab ishga tushirish;
• ekologiya, atrof-muhitni muhofaza qilish va tabiatdan foydalanish sohasidagi huquqbuzarlik holatlari (daraxtlar, butalar, boshqa o‘simliklar va nihollarni qonunga xilof ravishda kesish, kundakov qilish, shikastlantirish, yo‘q qilish yoki boshqa joyga ko‘chirib o‘tkazish holatlari bundan mustasno) bo‘yicha fotosurat va videoyozuvlarni yuborgan shaxslarni huquqbuzardan undirilgan jarima miqdorining o‘n besh foizi;
• daraxtlar, butalar, boshqa o‘simliklar va nihollarni qonunga xilof ravishda kesish, kundakov qilish, shikastlantirish, yo‘q qilish yoki boshqa joyga ko‘chirib o‘tkazish bo‘yicha holatlari to‘g‘risidagi fotosurat va videoyozuvlarni yuborgan shaxslarni har bir tasdiqlangan holat bo‘yicha huquqbuzardan undirilgan mablag‘lar hisobidan bazaviy hisoblash miqdorining bir baravariga teng miqdordagi pul mukofoti bilan rag‘batlantirish;

moddiy madaniy meros obektlarini muhofaza qilish va ulardan foydalanish to‘g‘risidagi qonun buzilishi holatlari haqidagi fotosuratlar va videoyozuvlarni yuborgan shaxslarni:

• ma’muriy huquqbuzarlik aniqlanganda – sudning ma’muriy jazo qo‘llash to‘g‘risida qonuniy kuchga kirgan qaroriga asosan bazaviy hisoblash miqdorining 1 baravari miqdorida;
• jinoyat aniqlanganda – sudning qonuniy kuchga kirgan ayblov hukmiga asosan bazaviy hisoblash miqdorining 3 baravari miqdorida pul mukofoti bilan rag‘batlantirish to‘g‘risidagi taklifiga rozilik beriladi.

Axborot tizimidagi mobil ilovalar quyidagi imkoniyatlarni nazarda tutadi:

• davlat ekologik nazorati obektlari, muhofaza etiladigan tabiiy hududlar faoliyati, daraxtlar va butalar kesilishining oldini olish, chiqindilar va moddiy madaniy meros obektlari bilan bog‘liq ishlarni amalga oshirish ustidan samarali jamoatchilik nazoratini o‘rnatish;
• jismoniy shaxslar tomonidan aniqlangan ekologiya, atrof-muhitni muhofaza qilish va tabiatdan foydalanish, shuningdek, moddiy madaniy meros obektlarini muhofaza qilish va ulardan foydalanish sohasida huquqbuzarlik holatlari to‘g‘risidagi ma’lumotlarni (foto va video materiallarni) Ichki ishlar vazirligi, Davlat ekologiya qo‘mitasi hamda Madaniy meros agentligiga manzil (geografik) belgilari bo‘yicha yuborish;
• sohaga oid huquqbuzarliklar haqida xabar bergan jismoniy shaxslarga belgilangan tartibda pul mukofotlarini to‘lash;
• sohaga oid huquqbuzarliklar, normativ-huquqiy hujjatlar va statistik ma’lumotlar bazasi bilan tanishish;
• sodir etilgan ma’muriy huquqbuzarliklar yuzasidan ma’muriy huquqbuzarlik hujjatlari (bayonnoma va qarorlar)ni elektron shaklda tuzish orqali ushbu huquqbuzarliklar haqidagi ma’lumotlarni Ichki ishlar vazirligining “Ye-ma’muriy ish” tizimiga kiritish;
• mobil ilovalar orqali taqdim etilgan foto va video materiallar bo‘yicha mas’ul organlar tomonidan amalga oshirilgan ishlar holatini monitoring qilish, shuningdek, qonunchilik hujjatlari ijrosini ta’minlash yuzasidan huquqbuzarlarga avval berilgan majburiy ko‘rsatmalar va talabnomalar bo‘yicha amalga oshirilgan boshqa zarur chora-tadbirlardan xabardor bo‘lish;
• hududlar va tuman (shahar)lar kesimida axborot tizimiga kelib tushgan xabarlar orqali aniqlangan huquqbuzarliklar to‘g‘risida ma’lumotlarni joriy etish hamda yuritish.