Ekologiya va iqlim oʻzgarishi milliy qoʻmitasi Milliy kutubxona ortidagi maydonda avtoturargoh qurilishi rejalashtirilgani haqidagi xabarlar yuzasidan munosabat bildirib, hozircha ekologik ekspertiza xulosasi mavjud emasligini maʼlum qildi.
Bayonotda hududdagi har qanday qurilish va obodonlashtirish ishlari, jumladan, daraxt va butalar, yashil maydonlar hamda tuproq qoplamiga taʼsir koʻrsatishi mumkin boʻlgan ishlar tegishli ekologik baholashdan oʻtkazilmasdan amalga oshirilishi mumkin emasligi qayd etilgan.
Loyiha doirasida 1 mingdan ortiq daraxt va buta ekish rejalashtirilgan. Biroq qoʻmitaga koʻra, yangi koʻchatlar mavjud koʻp yillik daraxtlar va shakllangan yashil hududlarning ekologik, iqlimiy hamda rekreatsion ahamiyatining oʻrnini toʻliq bosa olmaydi.
Qoʻmita hududdagi mavjud yashil maydon va daraxtlarni maksimal darajada saqlab qolish, ularni toʻliq xatlovdan oʻtkazish hamda loyiha hujjatlarini belgilangan tartibda ekologik ekspertizadan oʻtkazish zarurligini bildirdi.
Avtoturargoh loyihasi haqida
Toshkent shahri hokimligi Alisher Navoiy nomidagi Oʻzbekiston Milliy kutubxonasi ortidagi 1,3 gektar maydonni avtoturargoh tashkil etish uchun auksionga chiqarmoqchi.
Loyiha davlat-xususiy sheriklik asosida amalga oshirilib, hududdan 10 yil foydalanish huquqi berilishi koʻzda tutilgan. Mavjud daraxtlar saqlanib, 1 mingdan ortiq daraxt va buta ekish hamda 720 metrlik piyodalar yoʻlagini barpo etish rejalashtirilgan.
Jamoatchilik bu loyihani keskin norozilik bilan qarshi oldi.
Urbanizatsiya va uy-joy bozori milliy qoʻmitasi ham Toshkentdagi ayrim yashil hududlarda avtoturargoh qurilishi yuzasidan munosabat bildirib, shahar markazidagi yashil hududlarni kamaytirish va jamoat joylarida konstruktiv qurilishlarni amalga oshirish maqsadga muvofiq emasligini qayd etdi.
Shuningdek, avtoturargohlarni tashkil etishda koʻkalamzor maydonlarning qisqarishi hamda piyodalar uchun yaratilgan sharoitlarning yomonlashishiga yoʻl qoʻyilmasligi kerakligi taʼkidlangan.
