May oyi boshida o‘zbekistonliklar necha kun dam oladi?

O‘zbekistonda may oyi boshida ikkita bayram – Ramazon hayiti hamda Xotira va qadrlash kunlari nishonlanadi. Shu bois oy boshida dam olish kunlari sezilarli ko‘p bo‘ladi.

2021 yildan boshlab o‘rnatilgan tartibga binoan, qator bayramlar, xususan Ramazon hayitida ham xodimlar kamida 3 kun dam olishi belgilangan.

Dekabr oyida imzolangan prezident farmoniga asosan, 2022 yilda haftasiga 6 kun ishlaydigan xodimlar uchun 4 va 5 may qo‘shimcha dam olish kunlari deb belgilangan. Bunda Ramazon oyi 3 apreldan boshlanishi va 30 kun davom etib, hayit 3 mayga to‘g‘ri kelishi taxmin qilingan.

Ramazon oyi 2 aprel kuni boshlangani hisobga olinsa, hayit bayrami 2 mayga to‘g‘ri kelishi, shu bois qo‘shimcha dam olish kunlari oldinga surilishi mumkin. Shu bilan birga, Oy ko‘rinishiga qarab, hayit 1 mayga to‘g‘ri kelishi ehtimoli ham bor.

2022 yil may oyi boshidagi dam olish kunlari – haftasiga 6 kun ishlaydiganlar uchun*:

• 1 may, yakshanba – odatiy dam olish kuni
• 2 may, dushanba – Ramazon hayiti – ishlanmaydigan bayram kuni*
• 3 may, seshanba – qo‘shimcha dam olish kuni*
• 4 may, chorshanba – qo‘shimcha dam olish kuni*
• 8 may, yakshanba – odatiy dam olish kuni
• 9 may, dushanba – Xotira va qadrlash kuni – ishlanmaydigan bayram kuni

* Ramazon hayiti Oy chiqishiga qarab 1 may yoki 2 may kuni nishonlanadi. Qo‘shimcha dam olish kunlari shunga muvofiq surilishi mumkin.

Haftasiga 5 kun ishlovchilar uchun may oyida qo‘shimcha dam olish kuni belgilanmagan. Biroq ular ham 3–4 may (dushanba–chorshanba) kunlari dam olishadi. Aniqrog‘i, 5 kun ishlovchilarning 7 may (shanba) va 14 may (shanba)dagi dam olish kunlari Hayit bayramidan keyingi kunlarga ko‘chiriladi.

2022 yil may oyi boshidagi dam olish kunlari – haftasiga 5 kun ishlaydiganlar uchun*:

• (30 aprel, shanba – odatiy dam olish kuni)
• 1 may, yakshanba – odatiy dam olish kuni
• 2 may, dushanba – Ramazon hayiti – ishlanmaydigan bayram kuni*
• 3 may, seshanba – 7 may, shanbadan ko‘chirilgan dam olish kuni*
• 4 may, chorshanba – 14 may, shanbadan ko‘chirilgan dam olish kuni*
• 8 may, yakshanba – odatiy dam olish kuni
• 9 may, dushanba – Xotira va qadrlash kuni – ishlanmaydigan bayram kuni

* Ramazon hayiti Oy chiqishiga qarab 1 may yoki 2 may kuni nishonlanadi. 7 va 14 maydan ko‘chirilgan dam olish kunlari shunga muvofiq surilishi mumkin.

Eslatib o‘tamiz, budjet tashkilotlarida qo‘shimcha dam olish kunlari har yilgi mehnat ta’tilining davomiyligini qisqartirish hisobiga qoplanadi.