O‘zbekistonda xotin-qizlar va bolalar huquqlarini himoya qilish kuchaytiriladi

Oliy Majlis Senatida xotin-qizlar va bolalar huquqlarini himoya qilish, shuningdek, voyaga yetmaganlarga nisbatan nojo‘ya xatti-harakatlarni sodir etganlik uchun javobgarlikni yanada kuchaytirish masalalariga bag‘ishlangan majlis o‘tkazildi. Senat raisi Tanzila Norboyeva boshchiligida o‘tgan yig‘ilishda mutasaddi tashkilotlardan tashqari jamoatchilik faollari ham qatnashdi.

Majlisda xotin-qizlar va voyaga yetmaganlarga nisbatan zo‘ravonlik va  shilqimlik holatlari hali ham uchrab turgani, ularning huquqlarini himoya qilish masalasi ko‘rib chiqildi.

Raqamlarga ko‘ra, 2021 yilda respublika bo‘yicha jami 39 343 nafar xotin-qiz tazyiq va zo‘ravonlikka uchragan. Ularning 87,2 foizi (34 330) oilada, 9 foizi (3 557) ko‘chada, 2,3 foizi (917) jamoat joylarida, 1,1 foizi (427) ish joyida ro‘y bergan.

Bundan tashqari, 9861 nafar yoshlar va 378 nafar voyaga yetmaganlar tazyiq va zo‘ravonlikka uchragan.

Ushbu muammolar bilan ishlash maqsadida Senatda Xotin-qizlar va bolalar huquqlarini himoya qilish, shuningdek, voyaga yetmaganlarga nisbatan nomaqbul harakatlarni sodir etganlik uchun javobgarlikni yanada kuchaytirish masalalarini o‘rganish bo‘yicha Ishchi guruh tuzildi.

Ishchi guruhga huquqni qo‘llash amaliyotini tahlil qilish va amaldagi normativ-huquqiy hujjatlarni xatlovdan o‘tkazish, xalqaro tajribani chuqur o‘rganish, xotin-qizlar va bolalar huquqlarini himoya qilish sohasidagi qonunchilik bazasini takomillashtirish bo‘yicha takliflar ishlab chiqish vazifalari yuklatildi. Bu vazifalar keyinchalik mamlakat parlamenti tomonidan ko‘rib chiqilishi qayd etildi.

Bu yo‘nalishda amalga oshiriladigan ishlarga nodavlat notijorat tashkilotlar va mustaqil ekspertlar ham hamkorlikka taklif etiladi. Ular senat14@exat.uz, qonunchilik@senat.go.uz manzillariga murojaat qilishlari mumkin.