Вазирлар Маҳкамасининг “Республикада қон билан ишлаш хизмати муассасалари фаолиятини янада такомиллаштириш, аҳоли орасида беғараз донорлик ҳаракатини ривожлантириш чоралари тўғрисида”ги қарори лойиҳаси эълон қилинди.
Қуйидагилар қон билан ишлаш хизматини ривожлантириш асосий йўналишлари этиб белгиланади:
аҳоли орасида беғараз донорлик маданиятини шакллантириш, донорлик ҳаракатини кенг жамоатчилик иштирокида ривожлантириш, қон донорларига сифатли хизмат кўрсатиш ва улар учун қулай шарт-шароитлар яратиш;
қон билан ишлаш хизмати муассасаларини юқори технологик ускуналари билан жиҳозлаш, гемотрансмисcив инфекцияларга текширишда замонавий иммунофермент текширувлари билан бир қаторда ПЗР-текширувларини амалиётга татбиқ этиш;
илғор хорижий тажриба асосида клиник ва ишлаб чиқариш трансфузиологияси йўналишлари бўйича мутахассисларни тайёрлаш, қайта тайёрлаш ва малакасини ошириш, соҳа ходимларини нуфузли хорижий тиббиёт муассасалари ва марказларида малака оширишни ташкил этиш;
трансфузиология йўналишида юқори технологияларга асосланган фундаментал, инновацион ва илмий-амалий тадқиқотлар олиб бориш, ходимлар илмий салоҳиятини ошириш;
қон билан ишлаш хизмати муассасалари сарф воситаларига бўлган эҳтиёжини бюджет маблағлари ҳисобидан тўлиқ қоплаш;
оммавий ахборот воситалари ва ижтимоий тармоқлар орқали аҳоли орасида қон донорлиги аҳамиятини кенг тарғиб қилиш, беғараз донорликни ривожлантириш бўйича волонтёрлик ҳаракатини оммалаштириш, сайёр донорлик кўламини кенгайтириш.
Ҳар ой иккинчи ҳафтаси “Қон донорлиги ҳафталиги” этиб белгиланади.
Соғлиқни сақлаш вазирлиги, Ёшлар ишлари агентлиги, Миллий телерадиокомпания, Миллий ахборот агентлиги, Ахборот ва оммавий коммуникациялар агентлиги бошқа вазирлик ва идоралар, Қорақалпоғистон Вазирлар Кенгаши, вилоятлар ва Тошкент шаҳар ҳокимликлари билан биргаликда “Қон донорлиги ҳафталиги” доирасида:
аҳоли орасида беғараз донорлик ҳаракатини тарғиб этувчи видеороликлар тайёрлайди;
қон донорлигини ривожлантиришга бағишланган телекўрсатув ва радиоэшиттиришларни ташкил этади;
қон донорлиги муаммоларига бағишланган ижтимоий реклама маҳсулотларини тайёрлайди;
интернет, ижтимоий тармоқлар ва газеталарда қон донорлигининг аҳамияти тўғрисида мақолалар чоп этади;
ёшларнинг “Ўзбекистон фахрий донори” кўкрак нишонига сазовор бўлган шахслар ва кўп йиллар давомида беғараз қон топшириб келаётган донорлар билан учрашувлари ва давра суҳбатларини ташкил этади;
ушбу жараёнга таниқли инсонлар, спорт усталари, санъаткорлар, дин вакиллари, блогерлар ва маҳалла нуронийларини жалб қилади;
вазирлик, идора, корхона, маҳаллалар, таълим муассасалари, ҳарбий қисмлар ва бошқа ташкилотларда беғараз донорлик акцияларини ташкил этади ва ушбу ташкилотларда сайёр донорлик гуруҳлари фаолиятини йўлга қўяди;
беғараз қон донорлиги шиори остида хайрия марафон ва фестивалларни ўтказади.
2022 йил 1 июлдан бошлаб:
а) “Ўзбекистон фахрий донори” кўкрак нишони билан тақдирланган шахсларга:
жамоат транспортида қатнаш учун имтиёзли йўл чиптаси берилади;
давлат соғлиқни сақлаш муассасаларида бирламчи тиббий кўрикдан навбатда турмасдан ўтиш ҳуқуқи берилади;
санаторий-курортларда даволаниш учун йўлланмаларни навбатда турмасдан олиш ҳуқуқи берилади;
б) доимий (йилига камида 3 марта қон топширувчи) донорлар
ва улар яқин қариндошлари (ота-оналари, турмуш ўртоғи, фарзандлари, турмуш ўртоғининг ота-оналари) стационар даволаниш жараёнида қон ва унинг компонентлари билан монеликсиз таъминланади;
в) донорларни овқатлантириш билан боғлиқ маблағ сарфи қиймати республика бўйича бир хил – меҳнатга ҳақ тўлаш энг кам миқдори 3 фоизи миқдорида белгиланади;
г) иммун донорларга ўтказилган иммунизация ва топширилган иммун плазмаси учун ҳақ тўлаш қиймати бюджет ташкилотлари ходимлари иш ҳақи, пенсиялар, стипендиялар ҳамда нафақалар миқдори оширилиши даражаси муносиб равишда индексация қилиб борилади.
