08:17 / 21.06.2022
7854

Samarqand shahrida savdo do‘koni yonib ketdi

Yong‘in oqibatida omborxona va savdo do‘konining taxminan 210 metr kvadrat maydonda shift va tom qismi hamda omborxona ichidagi paxta toylari yonib ketgan.

Samarqand viloyati Favqulodda vaziyatlar boshqarmasi axborot xizmatining xabar berishicha, 2022 yil 20 iyun kuni soat 19:25 da Samarqand shahri «Bog‘isaroy» MFY, Spitamen shohko‘chasi 68-uyda joylashgan, 1985 yilda tug‘ilgan fuqaro S.T. ga tegishli bo‘lgan «Saidabegim» oilaviy korxonasiga qarashli omborxona va savdo do‘konida yong‘in sodir bo‘layotgani to‘g‘risida viloyat FVBga xabar kelib tushgan.

Hodisa joyiga birinchi yong‘in qutqaruv ekipaji soat 19:28 da yetib borib, soat 20:00 da qurshab olgan va yong‘in soat 20:35 da bartaraf etilgan. Yong‘inni bartaraf etishga FVBning 6 ta yong‘in-qutqaruv ekipaji va 2 ta maxsus suv tashish texnikasi jalb etilgan.

Dastlabki ma’lumotlarga ko‘ra, yong‘in oqibatida omborxona va savdo do‘konining taxminan 210 metr kvadrat maydonda shift va tom qismi hamda  omborxona ichida paxta toylari yonib zararlangan. Yong‘indan savdo do‘koni va omborxonaning 350 metr kvadrat qismi saqlab qolingan.

Qayd etilishicha, hodisa oqibatida hech kim tan jarohati olmagan va halok bo‘lmagan. Yong‘inga elektr simlarining qisqa tutashuvi sabab bo‘lgani taxmin qilinmoqda. Hozirda yong‘indan keltirilgan moddiy zarar miqdori aniqlanmoqda.

Eslatib o‘tamiz, so‘nggi 2 haftada Samarqand viloyatida savdo do‘konlarining yonib ketishi bo‘yicha beshta holat qayd etildi.

5 iyun kuni Narpay tumani Sarbozor mahallasida joylashgan bozorda yong‘in sodir bo‘lib, 20 dan oshiq savdo do‘konlari butunlay yonib ketgandi.

7 iyun kuni Samarqand shahri Mirzo Ulug‘bek ko‘chasida joylashgan bir necha savdo va xizmat ko‘rsatish do‘konlarida yong‘in sodir bo‘lib, ularning tom va shift qismi yonib ketdi.

9 iyun kuni Oqdaryo tumanidagi bozorda yong‘in sodir bo‘lib, bir nechta xo‘jalik mollari va oziq-ovqat sotishga ixtisoslangan savdo do‘konlari yonib ketdi.

12 iyun kuni Samarqand tumanida joylashgan savdo do‘konida yong‘in sodir bo‘lib, uning 200 metr kvadrat maydonda tom va shift qismi hamda turli mahsulotlar yonib ketgandi.

Mavzuga oid
Top