Qariyb 4 daqiqalik “massaj sessiyasi”da tibbiyot xodimi kiyimidagi noma’lum erkak kichik yoshdagi bolani turli usullar bilan massaj qilgani, go‘dak jismoniy og‘riqlarga dosh berolmay yig‘lagani ko‘rinadi.
Erkak tomonidan qo‘llanayotgan usullar xavfli ekani, tinimsiz yig‘layotgan bolaning asab tizimi shikastlanishi mumkinligi ro‘yirost ko‘rinib turgan bo‘lsa-da, video muallifi (ovoziga qaraganda ayol kishi) bamaylixotir tasvirga olishda davom etgan.
Kadr ortidagi ovozlardan xonada yana bir yoki ikki nafar ayol (yoki qiz) ham bo‘lganini eshitish mumkin.
Kuni kecha Toshkentda ham tibbiyot talablariga mutlaqo mos bo‘lmagan xuddi shunday uqalash muolajasi amalga oshirilayotgani aks etgan videolavha internetda tarqalgan edi. Sog‘liqni saqlash vazirligi massajchining tegishli na ruxsatnomasi, na sertifikati, na fizioterapiya yo‘nalishidagi diplom va na malaka toifasi yo‘qligini ma’lum qilgandi.
Sog‘liqni saqlash vazirligi yuqoridagi holatga huquqiy baho berish uchun huquq-tartibot idoralariga murojaat qilinganini ma’lum qilgan. Biroq shundan keyin huquq organlaridan hozircha izoh bo‘lmadi.
Respublika ixtisoslashtirilgan travmatologiya va ortopediya ilmiy-amaliy tibbiyot markazi mutaxassislari internetda tarqalgan videodagi massajchining xatti-harakatlarini qoralashgandi. Uqalash muolajasi chog‘ida kichik yoshli bemorda qo‘rquv bo‘lmasligi, videoda aks etgan holatda esa bola yonida yaqini o‘tirganiga qaramay, tinimsiz yig‘lab, bezovta bo‘layotgani, bu uning nafaqat jismoniy salomatligi, balki ruhiyatiga ham juda yomon ta’sir ko‘rsatishi, bunday shafqatsiz massajdan so‘ng paylar jarohatlanishi va hatto suyaklar sinishi kuzatilishi mumkinligini ta’kidlashgandi.
Sog‘liqni saqlash vaziri Behzod Musayev ham holatga munosabat bildirib, ota-onalardan bunday shaxslarga farzandlarining taqdiri va salomatligini ishonib topshirmaslikni so‘ragan
