AQSh Rossiya bilan o‘g‘itlar va oziq-ovqat bo‘yicha bitimlarga ruxsat berdi

AQSh Moliya vazirligi Rossiya bilan o‘g‘itlar, oziq-ovqat, urug‘lar, dori-darmonlar va tibbiy asbob-uskunalar yetkazib berish bo‘yicha operatsiyalarni amalga oshirishga ruxsat berdi. Tegishli hujjat 14 iyul, payshanba kuni idora saytida e’lon qilindi. 

Hujjatda ta’kidlanishicha, «qishloq xo‘jaligi mahsulotlari, qishloq xo‘jaligi texnikasi, dori vositalari, tibbiy buyumlar va ular uchun butlovchi qismlarni ishlab chiqarish, sotish, tashish yoki tibbiy asboblar uchun dasturiy ta’minotni yangilash; COVID-19'ning oldini olish, tashxis qo‘yish yoki davolash; davom etayotgan klinik sinovlar va boshqa tibbiy tadqiqotlar» bilan bog‘liq barcha tranzaksiyalardan sanksiyalar olib tashlandi.

Bundan tashqari, AQSh Moliya vazirligi Alfa-Bankning Qozog‘istondagi shu’ba korxonasiga nisbatan sanksiyalarni bekor qildi va «Gazprom»ning Germaniyadagi sobiq shu’ba korxonasi Gazprom Germania bilan operatsiyalarga vaqtinchalik ruxsat berdi. Securing Energy for Europe (Gazprom Germania nomi, hozir Germaniya hukumati nazorati ostida) bilan bitimlar 16 dekabrgacha ruxsat etiladi.

Bir kun avval Istanbulda Rossiya, Ukraina, Turkiya va BMT vakillari Ukraina portlaridan g‘alla eksportini qayta tiklash masalasi bo‘yicha muzokara o‘tkazgan edi. Turkiya delegatsiyalar kelishuvni imzolash uchun kelasi hafta yana uchrashishini ma’lum qildi. 

«Qo‘shma Shtatlar BMTning Ukraina va Rossiya g‘allasini jahon bozorlariga olib chiqish va Rossiyaning Ukrainaga qarshi asossiz urushining global oziq-ovqat ta’minoti va narxlariga ta’sirini kamaytirish bo‘yicha sa’y-harakatlarini qat’iy qo‘llab-quvvatlaydi», - deya xabar berdi AQSh Moliya vazirligi.