Toshkentda ShHTga a’zo davlatlar tashqi ishlar vazirlari yig‘iladi

Bildirilishicha, uchrashuv O‘zbekistonning ShHTga amaldagi raisligining eng muhim voqealaridan biridir. Tadbirda ShHTga a’zo davlatlar tashqi ishlar vazirliklari rahbarlari, shuningdek, ShHT bosh kotibi va MATT ijroiya qo‘mitasi direktori ishtirok etadi.

Yig‘ilishda ShHTga a’zo davlatlar rahbarlari kengashining 2022 yil 15-16 sentabr kunlari Samarqand shahrida bo‘lib o‘tadigan majlisiga tayyorgarlik masalasiga alohida e’tibor qaratiladi. ShHTning navbatdagi sammiti uchun salmoqli hujjatlar to‘plami ma’qullanishi kutilmoqda.

Ular orasida O‘zbekiston tomoni tashabbusi bilan ishlab chiqilgan uzoq muddatli yaxshi qo‘shnichilik, do‘stlik va hamkorlik to‘g‘risidagi shartnomani amalga oshirish majmuaviy rejasi, o‘zaro bog‘liqlikni rivojlantirish va samarali transport yo‘laklarini yaratish bo‘yicha hamkorlik konsepsiyasi, ishbilarmon doiralar o‘rtasida sanoat kooperatsiyasini rag‘batlantirish dasturlari, «ShHT yaxshi niyat elchisi» faxriy unvoni to‘g‘risidagi nizom bor.

ShHTga a’zo davlat, kuzatuvchi davlat va ShHT muloqot bo‘yicha hamkori maqomini olish uchun tushgan arizalar ko‘rib chiqiladi. Vazirlar ShHT faoliyati turli yo‘nalishlaridagi hamkorlikning bugungi holati va uni rivojlantirish, xalqaro sheriklar bilan institutsional aloqalarni kengaytirish istiqbollarini muhokama qiladi.

Bundan tashqari, mintaqaviy va global kun tartibi dolzarb masalalari yuzasidan fikr almashish ham vazirlar yig‘ilishi kun tartibidan o‘rin olgan.