Namanganda pochta xizmati mansabdorlari 529 mln so‘mni talon-taroj qilishgan

Davlat xavfsizlik xizmati Namangan viloyati bo‘yicha boshqarmasi va Bosh prokuratura huzuridagi Iqtisodiy jinoyatlarga qarshi kurashish departamenti Namangan viloyat boshqarmasi tomonidan «O‘zbekiston pochtasi» AJ Namangan filiali Chortoq tuman pochta aloqa bog‘lamasi sobiq bosh hisobchisi N.T. va boshqa mansabdor shaxslari 529 mln so‘m pul mablag‘larini o‘zlashtirgani aniqlangan.

Xususan, ayblanuvchilar tomonidan fuqarolarning aliment pullari, pochta xizmatlari ko‘rsatilishidan tushgan daromadlari, obuna, kommunal to‘lovlardan tushgan mablag‘lar o‘zlarining plastik kartalariga noqonuniy ravishda o‘tkazilgan va konvert-marka mahsulotlarini noqonuniy sotish hamda ortiqcha ish haqlarini hisoblash orqali o‘zgalarning mablag‘lari o‘zlashtirilgan va kamomad qilish yo‘li bilan talon-taroj qilingan.

Hozirda T.N. va boshqalarga nisbatan Iqtisodiy jinoyatlarga qarshi kurashish departamenti Namangan viloyat boshqarmasi tomonidan Jinoyat kodeksining 167-moddasi 3-qismi a-bandi bilan jinoyat ishi qo‘zg‘atilib, tergov harakatlari olib borilmoqda.