Moskva oblastidagi Ozon omborida kuchli yong‘in sodir bo‘ldi

Moskva oblastida 3 avgust, chorshanba kuni Istra tumanidagi Petrovskoye qishlog‘ida joylashgan Ozon internet-do‘konining omborida yong‘in sodir bo‘ldi. Yong‘in maydoni 55 ming kvadrat metrni tashkil etdi. Yong‘in oqibatida bir kishi halok bo‘ldi, yana 13 kishi jarohat oldi, deb xabar bermoqda TASS va RIA «Novosti». 

Rossiya FVV ma’lumotlariga ko‘ra, Ozon omboridagi yong‘in haqida xabar tezkor idoralarga soat 12:33 da kelib tushgan, dastlab yong‘in maydoni 20 ming kvadrat metrni tashkil etgan. Soat 21:17 da yong‘in o‘chirilgan. Uni o‘chirishga 150 dan ortiq o‘t o‘chiruvchi va 40 ga yaqin texnika, jumladan, Mi-8 va Ka-32 vertolyotlari, shuningdek, yong‘inni o‘chirish poyezdi jalb etilgan, deb xabar beradi idora o‘z Telegram-kanalida. 

Omborning mingdan ortiq xodimi binolardan evakuatsiya qilindi. Istra shahar okrugi rahbari Tatyana Vitushevaning so‘zlariga ko‘ra, yong‘inga uchinchi murakkablik darajasi berilgan. 

Yong‘inning asosiy versiyalari sifatida o‘t qo‘yish va elektr jihozlarining nosozligi ko‘rib chiqilmoqda, dedi RIA «Novosti»ga favqulodda xizmatlar vakili. Tezkor xizmatlardagi TASS manbasiga ko‘ra, yong‘in elektr tarmog‘ining favqulodda ishlashi, xususan, uskunadagi qisqa tutashuv tufayli yuzaga kelgan, biroq o‘t qo‘yish versiyasi ham istisno etilmagan. 

Moskva oblasti prokuraturasi yong‘in bo‘yicha tergov boshlanganini, uning davomida «voqea sabablari va sharoitlari, shuningdek, mas’ul shaxslarning harakatlariga baho berilishi» haqida xabar qildi. 

Ozon ombori va u yerda saqlanayotgan tovarlar 17 milliard rubl miqdorida sug‘urta qilingan bo‘lsa, shundan 11 milliard rublga ombor ichidagi narsalar sug‘urta qilingan. 

«Shubhasiz, bu so‘nggi vaqtlardagi eng katta yo‘qotishlardan biri, umumiy zarar, hatto dastlabki ma’lumotlarga ko‘ra, 10 milliard rubldan ortiqni tashkil qilishi mumkin, kompaniyalar allaqachon mijozlarni baholashni va ular bilan ishlashni boshladilar», - deya jurnalistlarga ma’lum qildi Butunrossiya sug‘urtachilar ittifoqi rahbari Igor Yurgens.