Mualliflik huquqi obektlari elektron nusxalari yagona bazada saqlanadi

Nizom mualliflik huquqi obektlarini saqlashga qabul qiluvchi tashkilotlar (depozitariylar) tomonidan mualliflik huquqi obektlari elektron nazorat nusxalarini mualliflik huquqi obektlari yagona bazasida saqlash tartibini belgilaydi.

Yagona bazani yuritish, texnik ta’minlash hamda mualliflik huquqi obektlari elektron nazorat nusxalarini yagona bazaga kiritish jarayonlari Adliya vazirligi huzuridagi “Intellektual mulk markazi” davlat muassasasi tomonidan muvofiqlashtiriladi.

Yagona bazada quyidagi mualliflik huquqi obektlari elektron nazorat nusxalari saqlanadi: adabiy asarlar (adabiy-badiiy, ilmiy, o‘quv, publitsistik va boshqa asarlar); drama va ssenariy asarlari; matnli yoki matnsiz musiqa asarlari; musiqali drama asarlari; xoreografiya asarlari va pantomimalar; audiovizual asarlar; rangtasvir, haykaltaroshlik, grafika, dizayn asarlari va tasviriy san’at boshqa asarlari; manzarali-amaliy va sahna bezagi san’ati asarlari; arxitektura, shaharsozlik va sahna bezagi san’ati asarlari; fotografiya asarlari va fotografiyaga o‘xshash usullarda yaratilgan asarlar; geografiya, geologiya xaritalari va boshqa xaritalar, geografiya, topografiya va boshqa fanlarga taalluqli tarhlar, eskizlar va asarlar; barcha turdagi elektron hisoblash mashinalari uchun dasturlar.

Mualliflik huquqi obekti elektron nazorat nusxalari yagona bazada muddatsiz saqlanadi. Mualliflik huquqi obekti yagona bazaga kiritilgani haqidagi ma’lumotlar tanishib chiqish uchun ochiq hisoblanadi.