5-oktabr kuni Germaniya mudofaa vaziri Boris Pistorius va Quyi Saksoniya bosh vaziri Olaf Lis Emdenda harbiy-dengiz bazasi qurish boʻyicha niyatlar deklaratsiyasini imzoladi. Yangi baza mamlakat flotining Shimoliy dengiz sohilidagi ikkinchi tayanch nuqtasi boʻladi.
Pistorius Emden yana Germaniya harbiy-dengiz kuchlari bazasiga aylanishini maʼlum qildi. Uning taʼkidlashicha, hozirgi flot Bundesver tarixidagi eng kichigi boʻlsa-da, bajarishi lozim boʻlgan vazifalar koʻlami har qachongidan katta.
«Shuning uchun harbiy-dengiz floti kengayishi kerak va u kengayadi», - dedi vazir.
Emdenning tanlanishi uning strategik joylashuvi va qurilish uchun yetarlicha boʻsh maydonlar mavjudligi bilan izohlanmoqda. Loyiha doirasida kemalarning toʻxtash joylarini koʻpaytirish, prichallar uzunligini oshirish va harbiy xizmatchilar sonini kengaytirish rejalashtirilgan.
Hozir Germaniyaning Shimoliy dengiz sohilida faqat bitta - Vilgelmsxafendagi Xeppenzer-Groden harbiy-dengiz bazasi bor. Pistoriusga koʻra, ikkinchi bazaning paydo boʻlishi flotning harakatchanligi va turli vaziyatlarga moslashish imkoniyatini oshiradi.
Vazir jiddiy inqiroz yuz bergan taqdirda Germaniya flotining harakatlarini oldindan taxmin qilish qiyinlashishi, uning operativ imkoniyatlari esa kengayishini taʼkidladi.
Tagesschau maʼlumotiga koʻra, yangi portda fregatlar uchun yettita, minalarni qidirish va zararsizlantirish kemalari uchun oʻnta, buksirlar uchun yana oʻnta toʻxtash joyi tashkil etish koʻzda tutilgan. Baza Germaniya harbiy-dengiz kuchlarining yangi strategiyasida muhim oʻrin tutadi.
Nashr keltirgan ekspertlar bahosiga koʻra, Emdenning geografik afzalliklaridan biri - shahar Rossiyaning oʻrta masofali raketalari yetib borish hududidan tashqarida joylashganidir.
