Gazeta xodimlari oylab maosh olmayapti. Bosh muharrir esa tahririyat hisobidan olingan TrailBlazer’da yuradi

Kun.uz manbasi xabar berishicha, «Milliy tiklanish» demokratik partiyasi nashrida ishlovchi xodimlarga iyun oyidan buyon maosh berilmayapti.

«Oylab maosh berilmasligi birinchi marta emas. Bahorda ham oylik ololmaganmiz. Masalan, fevral va mart oylarining maoshi ham berilmagan. Navro‘z bayrami munosabati bilan 500 ming so‘mdan bayram puli berildi.

May oyida aprel oyida ishlagan davrimiz uchun ish haqimizni ololdik. O‘rtadagi ikki oylik pulimizni muassisimiz bo‘lgan «Milliy tiklanish» partiyasi o‘tkazib bergandi. Iyun oyida avans va kasb bayramimiz munosabati bilan ozroq mukofot puli olganmiz, u nima ham bo‘lardi. Hademay maktablarda o‘qish boshlanadi, hali bolalarimizga kiyim, o‘quv qurollari sotib olganimiz yo‘q», dedi ismi sir saqlanishini so‘ragan manba.

«Uch oydan beri oylik berilmayotgani yolg‘on. Bir oydan beri oylik berolmayapmiz. Gazetamiz 10 ming nusxada chop etiladi. Xarajatlarimiz juda katta. Tarqatish, tipografiya xarajatlari bor. Tarqatilayotgan 10 ming tiraj uchun partiya pul beradi.

Shu paytgacha 500 million so‘m pul berdi. Ikkinchi yarim yillikka partiya yana 500 million so‘m berishi kerak. Bir hafta-o‘n kuncha oldin «Ispolkom»da shu masala ko‘rildi, chunki partiya o‘zi «Ispolkom» yig‘ilishisiz pul berolmaydi, «Ispolkom» qarori bilan tahririyat xarajatlariga mablag‘ ajratiladigan bo‘ldi.

Tahririyat xarajatlari 100 foiz partiya tomonidan qoplanmaydi. Tahririyatning obunadan, reklamadan tushadigan mablag‘lari bor. Xarajatlarimizning 50 foizini partiya qoplab beradi, Alisher Qodirov shunday tashabbus bilan chiqqan. Bir paytlar bu judayam zararga ishlagan gazeta bo‘lgan. Men kelganimdan keyin 5-6 oy ichida xodimlardan 500 million so‘mdan ortiq qarzlarni uzganman. Gazetani 10 ming tirajga olib chiqdim. Noto‘g‘ri hisob-kitob qilganim uchun hozirgi muammolar, ish haqidan, tipografiyadan qarzlar yuzaga keldi. Menda hech qachon bunday holat bo‘lmagan ilgari. Yaqinda koviddan davolanib chiqdim. Undan oldin boshimga ancha tashvishlar tushdi, shifoxonada davolanib chiqdim. Shu jarayonda gazetaning faqat ijodiy jarayoniga aralasha oldim-u, iqtisodiy masalalarni hal qila olmadim. Shu uchun mana shu muammolar yuzaga keldi, bitta mening aybim bilan bo‘lyapti hammasi», deydi Mirodil Abdurahmonov.

Xodimlar bir necha oydan buyon maosh olmayotganliklarini tekshirish juda osonligi, buning uchun bankdan ularning plastik kartalariga tushgan mablag‘lar haqida ma’lumot olish kifoya ekanini aytib, bosh muharrirning so‘zlarini inkor qilishdi.

Ma’lum bo‘lishicha, «Milliy tiklanish» gazetasi balansida 4 ta avtomobil bor. Shulardan Gentra nashr bosh muharririga xizmat avtomobili sifatida ajratilgan. Ikkita Cobalt’ning biri mas’ul kotib xizmatida, yana biri esa partiyaning qaysidir viloyatdagi tuman kengashi balansiga o‘tkazib berilishi aytilgan bo‘lsa-da, tahririyat xodimlari uni bosh muharrirning hovlisida ko‘rishgan.

«Bosh muharririmizning Gentra’si bor edi. Lekin bunga qanoatlanmay o‘ziga gazetaning puliga TrailBlazer ovoldi. O‘zi zo‘rg‘a kun ko‘rayotgan bo‘lsak, bir so‘m daromadimiz bo‘lmasa. Tahririyatda yana ikkita Cobalt bor. Yaqin kunlargacha Gentra partiya hovlisida chang bosib yotardi, u ham ko‘rinmay qoldi.

Xodimlar tinmay oyligini so‘rayvergach, TrailBlazer sotuvga qo‘yilgani, sotilishi bilan ish haqlarimiz berilishini aytdi. Keyin esa uni garov qilib bankdan kredit olishga hujjat berilayotganini aytib, ish haqimizni erta beraman, indin beraman deb aldab yurdi. Kredit olingan taqdirda ham tahririyat balansida bir so‘m puli yo‘q. Ertaga olingan pulni xodimlarga maosh qilib beradimi yoki u boshqa qarzlarni yopishga ketadimi, noma’lum», deydi boshqa bir xodim.

Ma’lumot uchun, Telegram’dagi @UzAvtoSavdo_bot’da qayd etilishicha, TrailBlazer rusumidagi avtomobilning narxi 398 mln so‘mni tashkil etadi.

Gazeta bosh muharririning ta’kidlashicha, TrailBlazer 2021 yili bo‘lib o‘tgan prezident saylovida foydalanish maqsadida tahririyat mablag‘iga sotib olingan.

«TrailBlazer prezident sayloviga nomzod va uning ishonchli vakillarini hududlardagi saylovchilar bilan uchrashuvlarga olib yurish uchun olingan. Shu maqsadda partiya o‘zining bitta mashinasidan foydalangan bo‘lsa, o‘sha paytda bizda imkoniyat bo‘lgani uchun tahririyatga bitta mashina olindi va bu mashinadan saylovda foydalanildi. Saylovdan keyin bu mashina tahririyat balansida bo‘lgani uchun biz foydalanib turibmiz.

Ikkita eski mashinamiz bor,  yaroqsiz ahvolga kelib qolgan. Ular almashtirilyapti, yangi qilinyapti. Gentra partiya garajida turibdi. U ta’mirtalab mashina, avariya bo‘lgan. Shuning uchun undan foydalanilmayapti. Shu sababli TrailBlazer’da yuribman», deydi bosh muharrir.

Kun.uz manbasining aytishicha, «Milliy tiklanish» DP MIQning 5 avgust kuni bo‘lib o‘tgan yig‘ilishida partiya muasssisligidagi gazetani moliyaviy qo‘llab-quvvatlash va moliyaviy qiyinchiliklardan chiqib ketish choralarini ko‘rish masalasi muhokama qilingan hamda tahririyat balansidagi TrailBlazer’ni garovga qo‘yish evaziga bankdan kredit olish taklifi ma’qullangan. Biroq tahririyat xodimlari yig‘ilishdan so‘ng 20 kundan ko‘proq vaqt o‘tayotgan bo‘lsa-da hech qanday yangilik bo‘lmayotganini aytmoqda.

«Kredit olish – tahririyatning  tashabbusi. «Ispolkom» qarori ijrosi kechikayotgani, partiya ustaviga ko‘ra bizga to‘g‘ridan to‘g‘ri budjet mablag‘idan pul ajratish mumkin emasligi, partiyaning ikkilamchi hisobida mablag‘ yo‘qligi sababli bankdan kredit olib turishni taklif qildim. Partiya rahbariyati bunga rozilik bildirdi. Xudo xohlasa dushanba kuni xodimlarning kechikkan bir oylik maoshi, mukofot pullari va boshqalar beriladi. Bankdan olinadigan pul birinchi navbatda maoshlar va tipografiyadan qarzimizga yo‘naltiriladi. Bu unaqa fojiali narsamas-ku, nega buncha vahima qilinyapti, tushunmayapman», dedi Mirodil Abdurahmonov Kun.uz muxbiri bilan telefon orqali suhbatda.

Manbaning qo‘shimcha qilishicha, TrailBlazer «Milliy tiklanish» partiyasining 2021 yilda bo‘lib o‘tgan prezident saylovida ishtirokini moliyalashtirish uchun budjetdan ajratilgan mablag‘, ya’ni xalqning puliga sotib olingan. Markaziy saylov komissiyasi prezident saylovida qatnashadigan har bir siyosiy partiya uchun 3,1 mlrd so‘mdan ajratgandi.

Kun.uz manbalariga ko‘ra, partiya ushbu mablag‘larning katta qismini o‘zining asosiy targ‘ibot quroli bo‘lgan nashr hisobiga o‘tkazib bergan. Biroq bu pullar tez orada sob bo‘lgan. Xodimlar bosh muharrirga olingan qimmatbaho mashina chegirib tashlanganda ham tahririyat hisobida anchagina mablag‘ qolishi, biroq anchadan buyon betobligini bahona qilib ishga kelmayotgan bosh muharrir xarajatlar haqida ma’lumot berishdan qochayotganini aytishmoqda.

Gazetaga 2019 yildan buyon Mirodil Abdullayevich Abdurahmonov bosh muharrirlik qilib kelmoqda. 1964 yili Marg‘ilonda tug‘ilgan Abdurahmonov bungacha 10 yildan ko‘proq vaqt mobaynida «Milliy tiklanish» partiyasiga raqib bo‘lgan boshqa bir siyosiy partiya – O‘zLiDeP muassisligidagi «XXI asr» gazetasiga rahbarlik qilgan.

Davlat statistika qo‘mitasi ma’lumotlar bazasida qayd etilishicha, «Milliy tiklanish» gayetasining yagona muassisi «Milliy tiklanish» demokratik partiyasi hisoblanadi. MChJ shaklidagi tahririyatning ustav fondi 2 mln so‘m etib belgilangan.

MTDP yetakchisi Alisher Qodirov «Milliy tiklanish» gayetasi xodimlariga bir necha oydan beri maosh berilmayotgani haqidagi savollarga javoban partiya tahririyatning moliyaviy masalalariga aralashmasligi, bu masalada gazeta bosh muharriri bilan bog‘lanishni tavsiya qildi.

«Milliy tiklanish» gazetasi 1995 yil 10 iyundan buyon chop etiladi. Shu kungacha nashrning 1179 soni chiqqan. Gazetaning so‘nggi soni shu yil 17 avgust kuni nashrdan chiqqan. 24 avgust kuni chiqishi kerak bo‘lgan 31-son tahririyatning bosmaxonadan qarzdor bo‘lgani sababli chop etilmagan.