O‘zbekiston TIV Rossiyaning Kobuldagi elchixonasi yonidagi portlashni qoraladi

O‘zbekiston Tashqi ishlar vazirligi 5 sentabr kuni tongda Rossiyaning Kobuldagi elchixonasi konsullik bo‘limi yaqinida ro‘y bergan hamda diplomatik missiya xodimlari va Afg‘oniston fuqarolari halok bo‘lgan portlash yuzasidan bayonot berdi.

«Biz terrorchilik harakatini keskin qoralaymiz, — deyiladi O‘zbekiston Tashqi ishlar vazirligi bayonotida. - Biz ushbu g‘ayriinsoniy harakat tashkilotchilari va aybdorlarini aniqlash uchun barcha zarur choralarni ko‘rishga chaqiramiz».

Vazirlik, shuningdek, halok bo‘lganlarning oila a’zolari va yaqinlariga hamdardlik bildirib, jarohat olganlarning tezroq sog‘ayib ketishini tiladi.

Dastlabki ma’lumotlarga ko‘ra, hujum natijasida Rossiya elchixonasining ikkinchi kotibi va qo‘riqchisi halok bo‘lgan. Rossiya Tergov qo‘mitasi raisi Aleksandr Bastrikin jinoiy ish ochish vazifasini topshirdi, deb xabar beradi RIA «Novosti».

Kobul xavfsizlik departamenti matbuot kotibi Xolid Zadranning aytishicha, xudkush-terrorchi Rossiya elchixonasi oldida to‘plangan odamlar orasida o‘zini portlatib yubormoqchi bo‘lgan, biroq qo‘riqchilar uning shaxsini aniqlab, ushlab olishga harakat qilgan, shundan so‘ng portlash sodir bo‘lgan, deb yozadi TOLOnews.