08:15 / 28.09.2022
27790

Ukrainaning Rossiya tomonidan egallab olingan yerlarida «referendum»lar yakunlandi

Foto: AFP

Ukrainaning egallab olingan hududlarining Rossiya Federatsiyasi tarkibiga kirishi bo‘yicha «referendumlar» yakunlandi, deb xabar bermoqda Rossiya axborot agentliklari.

Rossiya hududlarida bo‘lib o‘tgan "Donetsk va Luhansk xalq respublikalari"ning Rossiya Federatsiyasi tarkibiga qo‘shilishi masalasi bo‘yicha ovoz berish yakunlandi. 

Ishtirokchilarning 98,69 foizi "LXR"ning Rossiyaga qo‘shilish tarafdori bo‘ldi, "DXR"ning Rossiyaga qo‘shilish masalasida ovoz berganlarning 97,93 foizi ijobiy fikr bildirgani aytiladi. 

Rossiya hududlarida 441 ming kishi "DXR"ning qo‘shilishi uchun, 394 ming kishi esa "LXR"ning qo‘shilishi uchun ovoz berdi.

O‘zini «DXR» va «LXR» deb e’lon qilgan hududlarda mahalliy aholi «respublikaning Rossiya Federatsiyasining sub’yekti huquqi asosida Rossiya tarkibiga kirishini» qo‘llab-quvvatlayaptimi, degan savol «ovozga» qo‘yildi. 

Ishg‘ol qilingan Zaporijjya va Xerson oblastlarida saylov byulletenlariga «Ukrainadan ajralib chiqish, mustaqil davlat tashkil etish va Rossiya Federatsiyasi tarkibiga Rossiya Federatsiyasi sub’yekti huquqi asosida kirish tarafdorimisiz?» degan savol qo‘yildi.

AQSh, Yevropa ittifoqi va NATO «ovoz berish» Rossiyaning Ukraina suvereniteti va hududiy yaxlitligi tamoyillariga tajovuz qilishi va xalqaro hamjamiyat tomonidan tan olinmasligini bir necha bor ta’kidladi.

Rossiya tomonidan bosib olingan Ukraina hududlarida o‘tkazilgan «referendumlar» qonuniylikka ega emas va xalqaro huquqni qo‘pol ravishda buzish hisoblanadi, dedi NATO bosh kotibi Yyens Stoltenberg Ukraina prezidenti Volodimir Zelenskiy bilan telefon orqali suhbatdan keyin. 

Shimoliy Atlantika alyansi bosh kotibi «bu hududlar Ukrainaga tegishli», deb ta’kidladi. NATO davlatlari Ukraina suvereniteti va o‘zini himoya qilish huquqini qat’iy qo‘llab-quvvatlamoqda, deya qo‘shimcha qildi Stoltenberg.

Bundan oldin Putin 30 sentabr kuni Ukrainadagi yangi annexia haqida e’lon qilishi mumkin ekani xabar qilingandi.

Buyuk Britaniya Mudofaa vazirligi fikricha, Rossiya prezidenti Vladimir Putin 30 sentabr kuni Ukrainaning egallab olingan hududlari Rossiya tarkibiga qo‘shilganini rasman e’lon qilishi mumkin. 

Buyuk Britaniya Mudofaa vazirligining 27 sentabr, seshanba kungi kunlik hisobotiga ko‘ra, Putinning Federal majlis ikkala palatasiga murojaati o‘sha kunga rejalashtirilgan va Rossiya prezidentida bundan annexiani rasman e’lon qilish uchun foydalanishga «haqiqiy imkoniyat» mavjud.

Mavzu
Rossiya-Ukraina urushi
2022 yil 22 fevral kuni Rossiya Ukraina chegarasidan o‘tib, qo‘shni mamlakatga bostirib kirdi. Ukraina armiyasi jang taklif qildi.
Barchasi
Top