Finlandiya 30 sentabrdan boshlab rossiyalik sayyohlar uchun chegarani yopadi

Finlandiya hukumati bayonotida aytilishicha, bu transchegaraviy transport oqimining sezilarli darajada qisqarishiga olib kelishi kutilmoqda.

Tashqi ishlar vaziri Pekka Haavisto matbuot anjumanida uning mamlakati rasmiylari hozirda rossiyaliklar oqimini Finlandiyaning xalqaro munosabatlariga tahdid deb bilishini tushuntirdi. 

Shu bilan birga, Rossiya fuqarolariga yaqin qarindoshlari bilan uchrashish, ishlash va o‘qish uchun mamlakat hududiga kirishga ruxsat beriladi.

Bundan oldin Rossiyada Ukrainaga qarshi urushda e’lon qilingan «qisman safarbarlik» fonida Latviya hukumati Rossiya bilan chegaradosh hududlarda favqulodda holat joriy qilgandi. 

Favqulodda holat Aluksne, Balvi va Ludza hududida, shuningdek, portlar, aeroportlar, chegara o‘tkazish punktlari va temiryo‘llarda joriy etilgan. Faqat 19 sentabrdan kuchga kirgan yangi mezonlarga javob beradigan rossiyaliklar Latviyaga kiritiladi. 

1 sentabr kuni Pragada bo‘lib o‘tgan norasmiy uchrashuvda Yevropa ittifoqi tashqi ishlar vazirlari Rossiya va YeI o‘rtasida vizalar berishning soddalashtirilgan tartibi haqidagi kelishuvni to‘xtatib turishga kelishib oldi. Bu - viza olishni uzoqroq, qiyinroq va qimmatroq qildi. Shuningdek, Rossiya bilan chegaradosh davlatlar Rossiya fuqarolarining kirishini milliy darajada cheklashi mumkinligi haqida qaror qabul qilindi.

Shundan so‘ng, Polsha, Litva, Latviya va Estoniya Yevropa ittifoqiga tashrif buyurishidan maqsad turizm, biznes, sport yoki madaniyat bo‘lgan Rossiya fuqarolarining kirishiga muvofiqlashtirilgan tarzda cheklovlar joriy etishga kelishib oldi. Istisnolar faqat yuk mashinalari haydovchilari, diplomatlar va gumanitar sabablarga ko‘ra chegarani kesib o‘tganlar, jumladan dissidentlar uchun amal qiladi. Rossiyadagi safarbarlik fonida Latviya safarbarlikdan qochgan rossiyaliklarga gumanitar va boshqa vizalar bermasligini e’lon qilgan.