11:25 / 10.10.2022
2590
Марказий банк томонидан «тартибга солиш қумдони»ни ташкил этиш тартиби тасдиқланди

Марказий банк бошқарувининг «Марказий банк томонидан молиявий хизматлар соҳасидаги махсус ҳуқуқий режимни жорий этиш тартиби тўғрисидаги низомни тасдиқлаш ҳақида»ги қарори қабул қилинди. 

Фото: Kun.uz

Низом молиявий операциялар, технологиялар ва хизматлар соҳасидаги махсус ҳуқуқий режимни («тартибга солиш қумдони») жорий этиш ва бекор қилиш, режим доирасида фаолиятни амалга ошириш тартибини белгилайди.

Тартибга солиш қумдони – амалдаги қонунчилик билан тартибга солинмаган янги технологияларни тажриба тариқасида синовдан ўтказиш учун жорий этиладиган алоҳида ҳуқуқий режим. Унга кўра, алоҳида бир ҳудудда муайян муддатга бошқа ҳуқуқий тартиб таъсир қилмайдиган ҳуқуқий режим яратилади.

Ҳужжатга кўра «тартибга солиш қумдони»ни жорий этиш учун молиявий хизмат қуйидаги мезонлардан бирига мувофиқ бўлиши лозим: молиявий хизматнинг республика молиявий хизматлар бозори учун янгилиги; молиявий хизмат истеъмол хусусиятлари мавжуд хизматларга нисбатан яхшилангани; молиявий хизматни кўрсатишга қонунчиликда чекловлар ёки ноаниқликлар мавжудлиги.

«Тартибга солиш қумдони»ни жорий этиш ҳақида ариза янги молиявий хизматни жорий этаётган Ўзбекистон резиденти бўлган юридик шахс томонидан берилади (банклар, нобанк кредит ташкилотлари, тўлов тизимлари операторлари, тўлов ташкилотлари, кредит бюролари, валюта биржалари).

Ариза берувчи юридик шахс қуйидаги талабларга жавоб бериши керак: қайта ташкил этиш ва тугатиш жараёнида эмаслиги; банкрот деб топилмаган ва унга нисбатан тўловга қобилиятсизлик бўйича иш қўзғатилмаган бўлиши; бенефициар мулкдорларида, бошқарув органлари аъзоларида иқтисодиёт соҳасидаги жиноятлар ёки бошқарув тартибига қарши жиноятлар ёки жиноий фаолиятдан олинган даромадларни легаллаштириш, терроризмни молиялаштириш ва оммавий қирғин қуроли тарқатилишини молиялаштириш билан боғлиқ жиноятлар учун тугалланмаган ёхуд олиб ташланмаган судланганлик ҳолатлари мавжуд бўлмаслиги; бенефициар мулкдорлари, бошқарув органлари аъзолари имтиёзли солиқ режимини тақдим этувчи ва (ёки) бенефициар мулкдор шахсини ошкор этишни ҳамда молиявий операцияларни ўтказишда ахборот тақдим этишни назарда тутмайдиган давлат ва ҳудуд резиденти бўлмаслиги, шундай давлат ва ҳудудда яшамаслиги ёки рўйхатдан ўтмагани; молиявий молиявий операцияларни амалга оширишга доир чекловлар қўлланилмагани.
 
«Тартибга солиш қумдони»ни жорий этиш ҳақида ариза 40 иш кун ичида кўриб чиқилади, натижаси бўйича уни жорий этиш ёки жорий этишни рад этиш ҳақида қарор қабул қилинади. Аризани кўриб чиққанлик учун йиғим ундирилмайди.

Ариза билан бир вақтда қатор ҳужжатлар, вақтинчалик тартиб лойиҳаси илова қилиниши лозим. Лойиҳада қуйидагилар акс эттирилиши керак: синовдан ўтказиладиган молиявий хизмат, тегишли бизнес-жараён тавсифи; синовдан ўтказиш бошланиш ва тугаш саналари; «тартибга солиш қумдони» иштирокчисига татбиқ этилмайдиган қонунчилик ҳужжатлари нормалари (мавжуд бўлганда); «тартибга солиш қумдони» шартлари, «тартибга солиш қумдони» иштирокчисига нисбатан жорий этиладиган чекловлар рўйхати; «тартибга солиш қумдони» жорий этилиши самарадорлиги ва натижадорлигини баҳолаш тартиб-таомиллари ва мезонларини; молиявий хизматни синовдан ўтказиш бекор қилинганда ёки муваффақиятсиз деб топилганда «тартибга солиш қумдони» иштирокчиси кейинги ҳаракатлари (мижозларга хизмат кўрсатиш ёки шартномаларни бекор қилиш, маблағларни қайтариш тартиби ва бошқа шартлар); мижозлар ҳуқуқлари ҳимоя қилинишини таъминловчи қоидалар; жиноий фаолиятдан олинган даромадларни легаллаштиришга, терроризмни молиялаштиришга ва оммавий қирғин қуролини тарқатишни молиялаштиришга қарши курашишга доир талаблар; молиявий хизматни синовдан ўтказиш жараёни ҳақида Марказий банкка ҳисобот тақдим этиш тартиби; молиявий хизматни синовдан ўтказиш натижалари тўғрисида ҳисобот тақдим этиш муддати; «тартибга солиш қумдони» доирасида Марказий банк билан ҳар қандай алоқа боғлаш усуллари; молиявий хизматни жорий этиш ва қўллаш учун зарур бўлган бошқа ахборотлар.
 
«Тартибга солиш қумдони» муддати Марказий банк томонидан белгиланадиган, уч йилдан ортиқ бўлмаган даврни ўз ичига олади. Шаффофликни таъминлаш мақсадида Марказий банк ўз расмий сайтида «тартибга солиш қумдони» рўйхатини юритади. 

Top