“Montaj” filmi Avstriyadagi kinofestivalda ishtirok etadi

“Montaj” qisqa metrajli badiiy filmi Avstriya poytaxti Vena shahrida bo‘lib o‘tadigan “Vienna International Film Awards” kinofestivalining final bosqichiga yo‘llanmani qo‘lga kiritdi. Ushbu film Kinematografiya agentligi “Yoshlik” kinostudiyasi tomonidan “Debut start 2021” kinofestivalida g‘olib bo‘lgan ssenariy asosida suratga olingan.

Kinokartina oila muqaddas ekani haqida. Kimki uni qadrlamasa, oxir-oqibat yo‘qotadi. Filmda bir-birini tushuna olmagan va hozir alohida yashayotgan oila a’zolarining hayoti haqida hikoya qilinadi.

Oilaning barcha a’zolari ham mukammal emas. Taqdir charxpalagi ularni turli manzillarga sochib yuborgan bo‘lsa-da, ular oilaviy uchrashuvni kutishadi va xohlashadi. Filmda fotograf Islomning buzilgan oilani tiklashga urinishi aks etgan.

Islom hayotdan haqiqiy san’at asarini izlaydi – binolardan, tabiatdan va turli narsalardan. Lekin uni topa olmaydi va u har bir qarindoshining oldiga borib, ularni suratga oladi. Shundan so‘ng u dunyodagi eng go‘zal san’at bu oila ekanini tushunadi.

“Montaj” filmi avvalroq “Moskva premerasi” xalqaro kinofestivali hamda Marokashda o‘tkaziladigan VII “Tetauon” xalqaro film maktablari kinofestivali final bosqichiga yo‘llanmani qo‘lga kiritgan edi.

Shuningdek, mazkur film Hong Kongda oliy o‘quv yurtlari o‘rtasidagi “Global University Film Awards 2022” festivalining kengaytirilgan ro‘yxatidan joy olgandi.

Avvalroq Yolqin To‘ychiyevning “Evrilish” filmi Janubiy Koreyaning Pusan shahrida joriy yilda yigirma yettinchi bor o‘tkazilgan xalqaro kinofestivalning “Kim Jiseok Award” nominatsiyasi g‘olibi deb topilgandi.