O‘zbekiston va Vengriya havo qatnovi to‘g‘risida hukumatlararo bitim loyihasini kelishib oldi

Toshkent shahrida bo‘lib o‘tgan Turkiy davlatlar tashkiloti transport vazirlari yig‘ilishi doirasida O‘zbekiston va Vengriya aviatsiya ma’muriyatlari o‘rtasida muzokaralar tashkil etildi.

Foto: Dunyo

Muzokaralar chog‘ida ikki davlat o‘rtasida muntazam havo qatnovini yo‘lga qo‘yish, tayinlangan aviakompaniyalarga parvozlarni amalga oshirish uchun tegishli huquqlarni berish hamda havo qatnovi to‘g‘risida hukumatlararo bitim loyihasi yakuniy matnini kelishish masalalari muhokama qilindi.

Muzokaralar yakuniga ko‘ra, tegishli bayonnoma imzolandi va bitim loyihasi yakuniy matni kelishildi. Tomonlar mazkur bitim imzolanishini tezlashtirish bo‘yicha tegishli ishlarni amalga oshirishga kelishib oldi.