Qoʻshimcha funksionallar
-
Tungi ko‘rinish
Hafta oxiriga borib harorat yanada pasayishi kutilmoqda
Bugun O‘zbekiston hududi bo‘yicha atmosfera fronti o‘tishida yomg‘ir yog‘adi, ba’zi joylarda kuchli bo‘ladi, Farg‘ona vodiysi viloyatlarida kun ikkinchi yarmida yomg‘ir yog‘ishi kutilmoqda.
"O‘zgidromet" xabariga ko‘ra, ayrim joylarda momaqaldiroq bo‘lishi mumkin. Respublika shimoliy hududlariga Volgabo‘yi hududlaridan sovuq havo massasi kirib kelishi boshlanadi, ayrim joylarda yomg‘ir yog‘adi, qorga aylanishi mumkin. Havo harorati 8-13 daraja iliq, shimolda 5-7 daraja iliq atrofida bo‘ladi.
Seshanba kuni sovuq havo massasi respublika barcha hududlariga asta-sekin kirib keladi, hudud katta qismida yomg‘ir yog‘adi, Buxoro, Navoiy viloyatlari ayrim tumanlarida ba’zi joylarda biroz yog‘ingarchilik bo‘lishi mumkin. Qoraqalpog‘iston Respublikasi va Xorazm viloyatida yog‘ingarchilik kutilmaydi. Kunduzgi harorat 5-8 daraja iliqni tashkil etadi, bu o‘rtacha iqlim qiymatlaridan 8-10 darajaga pastdir.
Bugun va ertaga respublika bo‘yicha ba’zi joylarda shamol 15-20 m/s gacha kuchayishi kutilmoqda. 9-11 noyabrda respublika hududi bo‘yicha yog‘ingarchilik kutilmaydi.
Sovuq havo massalari kirib kelishi natijasida 9-11 noyabrda harorat kechalari 0-2 daraja sovuqqacha pasayadi, kunduz kunlari asta-sekin isiydi. Haftaning oxiriga kelib harorat 10-14 daraja iliq atrofida va me’yorga yaqin bo‘ladi.
7-8 noyabr kunlari kuchli yomg‘ir yog‘ishi hisobiga respublikaning tog‘oldi va tog‘li hududlarida sel kelishi xavfi bor. Kechasi va ertalab ba’zi joylarga tuman tushishi mumkin.
