Xersonni to‘liq ozod qilish uchun ukrainalik harbiylarga besh kundan uch haftagacha vaqt kerak bo‘ladi. Bu haqda Ukraina prezidenti devonining maslahatchisi Aleksey Arestovich "Feygin Live" YouTube kanali efirida xabar qildi.
Uning so‘zlariga ko‘ra, muddatlar ko‘plab omillarga, jumladan, «Rossiya qo‘mondonligining rejalariga» bog‘liq.
Uning fikricha, aniq aytish mumkin bo‘lgan yagona narsa: Xerson yaqin kelajakda ozod qilinadi.
Bundan oldin Rossiya qo‘shinlari Xerson viloyatida bir nechta ko‘priklarni portlatib yuborgandi.
Xerson viloyatida Ingulets daryosi bo‘ylab o‘tgan Darevskiy ko‘prigi portlatib yuborildi, u Rossiya qo‘shinlari tomonidan egallab olingan Xerson va Nova Kaxovka o‘rtasida aloqa yo‘li bo‘lib xizmat qilayotgandi.
Mahalliy Telegram kanallar xabariga ko‘ra, ko‘prik Rossiya qo‘shinlari tomonidan portlatilgan.
Bundan tashqari, Xersonni o‘rab turgan boshqa bir qator o‘tish joylari - Ukraina Qurolli kuchlari ilgari harakat qila boshlagan Snigirevkaga kiraverishdagi Tyaginskiy piyodalar ko‘prigi va Novovasilevskiy ko‘prigi portlatilgani haqida xabar berilgan.
