Xerson gubernatori dron hujumida 24 kishi halok bo‘lganini aytdi

Rossiya tomonidan tayinlangan qo‘shib olingan Xerson viloyati “gubernatori” Vladimir Saldo 1 yanvar, payshanba kuni ertalab, yangi yil kechasida Ukraina Xorlidagi kafe va mehmonxonaga hujum qilganini ma’lum qildi. Xorli — viloyatning 2022 yildan buyon Rossiya nazoratida bo‘lgan o‘ng sohil qismida joylashgan qishloq.

Uning aytishicha, dronlar hujumi oqibatida 24 kishi, jumladan bir bola halok bo‘lgan va yana 50 kishi yaralangan. Bu haqda Vladimir Saldo 1 yanvar, payshanba kuni o‘zining Telegram-kanalida bildirgan. Keyinroq uning matbuot kotibi yaralanganlar soni 29 nafar ekanini aniqlashtirdi.

Gubernatorning ta’kidlashicha, taxminan yarim tunda sodir bo‘lgan Ukraina hujumi paytida go‘yoki yonuvchi aralashma quyilgan dron ishlatilgan — shu ham yong‘inga sabab bo‘lgan va u faqat ertalabga kelib o‘chirilgan.

RF Tergov qo‘mitasi terrorchilik harakati bo‘yicha jinoyat ishini qo‘zg‘atganini payshanba kuni TQning rasmiy vakili Svetlana Petrenko ma’lum qildi.

1 yanvar kuni ertalab Xersonda RFning zarbali dronlari hujumi oqibatida bir erkak halok bo‘lgan va 87 yoshli ayol yaralangan. Bu haqda Xerson viloyati harbiy ma’muriyati (VHM) rahbari Aleksandr Prokudin xabar qildi. Uning so‘zlariga ko‘ra, bu voqea shaharning Markaziy va Dniprovskiy tumanlarida sodir bo‘lgan.

Rossiya Xerson viloyatining chap sohil qismiga muntazam ravishda o‘q uzadi. Bu hudud Ukrainaning 2022 yil kuzidagi qarshi hujumi chog‘ida deokkupatsiya qilingan edi.

2025 yil 31 dekabr kuni Rossiya droni Novovoronsovka qishlog‘iga bergan zarba oqibatida 47 yoshli erkak halok bo‘ldi. 28 dekabr kuni Xersonning to‘qqiz nafar aholisi RF QKning artilleriya zarbasi vaqtida yaralangan. 25 dekabr kuni shunga o‘xshash otish shaharning markaziy qismidagi bozorga to‘g‘ri kelgan.

Human Righs Watch (HRW) tashkilotining 2025 yil iyun oyida e’lon qilingan hisobotiga ko‘ra, Rossiya armiyasi Xerson viloyatining chap sohilida tinch aholiga qarshi dronlardan “muntazam va ataylab” foydalanadi. Huquq himoyachilari fikricha, bunday qasddan qilingan hujumlar o‘nlab odamlarning halok bo‘lishiga va yuzlab fuqarolarning yaralanishiga olib kelgan.

2025 yilda BMT Inson huquqlari bo‘yicha oliy komissari boshqarmasi ham shunga o‘xshash bahoni bildirib, Rossiya dronlarini Ukrainadagi fuqarolar hayoti uchun asosiy tahdidlardan biri deb atagan. BMT ma’lumotlariga ko‘ra, keng ko‘lamli urush davomida bunday hujumlarning 62 foizi Xerson viloyati hududiga to‘g‘ri kelgan.