Turkiya mudofaa vazirligi «Changal va qilich» nomini olgan amaliyotdan maqsad «Istanbulda portlashlar tayyorlagan» kurdlarning bazalari bo‘lganini ma’lum qildi.
Turkiyada taqiqlangan Kurdiston ishchi partiyasi Istanbulda sodir etilgan teraktga aloqadorligini rad etmoqda.
Suriya kurdlari tashkilotlaridan birining vakili zarbalar qochqinlar yashaydigan ikki qishloq bo‘ylab berilganini ma’lum qilgan.
Foto: BURAK KARA
Havo reydlari boshlangach, Turkiya mudofaa vazirligining tvitter sahifasida «hisob-kitob soati» kelgani haqida bayonot berilib, qiruvchi samolyot havoga ko‘tarilishi va portlash tasvirlari e’lon qilindi.
«Terrorchilarning boshpanalari, bunkerlar, g‘orlar, tunnellar va omborlari muvaffaqiyatli yakson etildi», dedi Turkiya mudofaa vaziri Xulusi Akar. Keyinroq vazirlik Suriya va Iroq shimolida «kurd jangarilari bazalari» bo‘ylab berilgan zarbalar natijasida 89 nishon yo‘q qilingani haqida ma’lumot berdi.
Suriyadagi kurd qurolli tuzilmalari javob choralari ko‘rishni va’da qilishgan va zarbalar Kobani shahri, shuningdek aholi tig‘iz yashaydigan ikki qishloq bo‘ylab berilganini bildirishgan.
Yakshanba kuni kechqurun Turkiya davlat nashrlari Suriya hududidan uchirilgan raketa zarbasi oqibatida Turkiya-Suriya chegarasida uch kishi yaralangani haqida ma’lumot berdi.
Ofisi Buyuk Britaniyada joylashgan Suriya inson huquqlari bo‘yicha observatoriyasi ma’lumotlariga ko‘ra, turklarning aviazarbalari oqibatida Suriyaning o‘zida 30 kishi halok bo‘lgan.
Iroqda qanday nishonlarga zarba berilgani hozircha aniq emas.
