Fransiya va Angliya chorakfinalda to‘qnashadimi? Kunning asosiy intrigalari

Bugun Qatardagi jahon chempionati nimchorak finali doirasida yana ikki uchrashuv bo‘lib o‘tadi.

Fransiya — Polsha (Toshkent vaqti bilan soat 20:00)

Amaldagi jahon chempionlariga 1/8 finalda guruh bosqichidagi eng nursiz o‘yin ko‘rsatgan jamoalardan biri raqib bo‘ladi. Ammo bu polyaklar kuchsiz raqib ekanini anglatmaydi. Qolaversa, Voysex Shchensni qanday formada ekanini yodda tutish kerak. U uch o‘yinda 16 seyv amalga oshirdi va ikki o‘yinda darvozasi daxlsizligini saqladi, Messi va Ad-Dovsariyning penaltidan bergan zarbalarini qaytardi.

Polsha uchun Fransiya bilan o‘yin yili o‘yiniga aylansa, Desham jamoasi uchun bu favorit maqomini tasdiqlash va turnir vazifasini hal etish kerak bo‘ladigan klassik o‘yin bo‘ladi. Shuningdek, bu o‘yinda bir necha personal maqsadlar bo‘ladi.

Masalan, Olive Jiru hali terma jamoa uchun o‘z orzusidagi 52- golni urmadi, bu orqali u mamlakat tarixidagi eng yaxshi to‘purarga aylanishi mumkin. Kilian Mbappe esa jahon chempionatlaridagi 10 o‘yinda 7 gol urib ulgurgan va  Miroslav Klozening rekordini (16 gol) yangilash uchun bel bog‘lagan.

Polsha va Fransiya jahon chempionatlarida faqat bir marta —  1982 yilda uchinchi o‘rin uchun bahsda to‘qnashgan. O‘shanda polyaklar ustun kelishgan — 3:2. Fransuzlar uchun revansh olish vaqti keldimi?

Angliya — Senegal (Toshkent vaqti bilan soat 00:00)

Garet Sautgeyt boshqaruvidagi Angliya pragmatik o‘yin ko‘rsatadigan favorit sanaladi, ammo jamoa Qatarda ikki o‘yinda yirik hisobda g‘alaba qozondi. Inglizlar guruh bosqichidan ishonchli o‘tishdi va uch o‘yinda 9 gol urishdi. Ammo eng ajablanarlisi — Harri Keyn Qatarda hali gol urmagan, lekin uch golga assistentlik qilgan. Senegal bilan uchrashuv — to‘purarlar ro‘yxatiga kirish uchun navbatdagi urinish bo‘ladi, shu bilan birga jamoaga chorakfinalga o‘tish uchun yordam berish talab etiladi.

Senegal terma jamoasi o‘z tarixida ikkinchi bor pley-offda o‘ynaydi. Birinchisi 2002 yilga to‘g‘ri kelgandi, o‘shanda Aliu Sisse jamoa bosh murabbiyi emas, sardori edi. Sissega bu natijani takrorlashda Sado Manening yo‘qligi ham xalal bera olmadi — Ekvadorga qarshi hal qiluvchi o‘yinda raqib jarima maydoniga borgan Kulibali Senegal ertagi davom etishini ta’minladi. 1/8 finalda mag‘lubiyatga uchralsa ham afrikaliklar bu ishtirokni yodda saqlab qolishadi. Ammo hozirda barchaning xayoli Qatarda navbatdagi sensatsiya qayd etish bilan band — Angliyaga oson bo‘lmasligi aniq.

Chorakfinal

Bu juftlikda g‘olib bo‘lgan jamoalar 10 dekabr kuni «Al-Bayte» stadionida 1/4 final uchrashuvini o‘tkazishadi.