Низом банкларда аудиторлик текширувини ўтказиш ўзига хос хусусиятларини ҳамда банклар аудиторлик текширувларини ўтказиш ҳуқуқи учун аудитор малака сертификатини бериш, амал қилишини узайтириш ва тугатиш ҳамда аудиторлар реестрини юритиш тартибини белгилайди.

Банк молиявий ҳисоботи ва банклар гуруҳи консолидациялашган молиявий ҳисоботи аудиторлик текшируви штатида Марказий банк банкларда аудиторлик текширувларини ўтказиш ҳуқуқини берувчи малака сертификатига эга камида икки нафар аудитори (аудиторлик ташкилоти раҳбарини ҳисобга олган ҳолда) мавжуд бўлган аудиторлик ташкилоти томонидан ўтказилади.

Банкда ва банклар гуруҳида аудиторлик текширувини ўтказувчи аудиторлик ташкилот томонидан тайинланган аудиторлар гуруҳига раҳбарликни малака сертификатига эга бўлган аудитор амалга ошириши лозим.

Аудиторлик ташкилоти танловларини ўтказишга банк аудит қўмитаси масъул ҳисобланади. Банк кузатув кенгаши аудиторлик ташкилотини тайинлаш бўйича очиқ танловни ўтказиш ва очиқ танловда иштирок этаётган аудиторлик ташкилотлари аризаларини баҳолаш тартибини тасдиқлаши лозим.

Банк акциядорлари умумий йиғилишида йиллик аудиторлик текширувини ўтказувчи аудиторлик ташкилотини танлаш (тайинлаш) ҳақида қарор қабул қилинади. Аудиторлик ташкилоти билан тузилган шартнома нусхаси ва кўриб чиқилган бошқа номзодлар ҳақидаги маълумотлар уч банк иш куни ичида Марказий банкка тақдим этилади.

Банклар йиллик молиявий ҳисоботлари ва банклар гуруҳи йиллик консолидациялашган молиявий ҳисоботи аудиторлик текширувидан ўтказилиши мажбурийдир. Банк ва банклар гуруҳи аудиторлик текшируви Марказий банк талабига кўра умуман банк ёки банклар гуруҳи фаолияти бўйича ҳам, улар фаолияти алоҳида йўналишлари бўйича ҳам ўтказилиши мумкин.

Аудиторлик ташкилоти аудиторлик текширувини ўтказиш жараёнида банк ички назорат тизими ҳақида маълумот олиш мақсадида банк ички аудит хизмати ходимлари билан учрашувлар ўтказиши лозим.

Аудиторлик ташкилоти:

  • банклар ва банк фаолияти тўғрисидаги қонунчилик талаблари қўпол бузилишига олиб келувчи;
  • банк фаолиятига салбий таъсир кўрсатиши мумкин бўлган;
  • молиявий ҳисобот ишончлилиги ва бухгалтерия ҳисобини юритиш тартиби қонунчиликда белгиланган талабларга мувофиқлиги тўғрисида фикр билдиришни аудиторлик ташкилоти томонидан рад этишга ёки фикрларни қўшимча шарт билан билдиришга олиб келиши мумкин бўлган ҳолатлар тўғрисида Марказий банкни дарҳол хабардор этиши шарт.