Mustaqil komissiya Bosh prokuraturadan Nukus voqealarida inson huquqlarining buzilish holatlari bo‘yicha axborot so‘radi

Qoraqalpog‘istonda yuz bergan voqealarni o‘rganish va ular yuzasidan mustaqil tekshiruv o‘tkazish bo‘yicha tuzilgan komissiya Buxoroda bo‘layotgan sud bo‘yicha majlis o‘tkazdi. Majlisda sud jarayonlari ochiq o‘tkazilayotgani bildirilib, qatnashchilarning ko‘rsatmalari tahlil qilingan.

Shuningdek, komissiya Bosh prokuraturaga murojaat qilib, sud jarayonlarida ishtirok etishi davomida bu borada yuzaga kelayotgan va keng aholi vakillarini xavotirga solayotgan holatlarga oydinlik kiritilishini so‘ragan.

«Murojaatda ommaviy tartibsizliklarning sodir bo‘lishida aybdor sifatida hibsga olingan 516 nafar fuqaro, hozirda ishi sudda ko‘rib chiqilayotgan 22 nafar ayblanuvchi, yopiq muassasalarda vaqtincha ushlab turilgan boshqa shaxslar, ma’muriy javobgarlikka tortilganlar, shuningdek, tartibsizliklar vaqtida huquqni himoya qiluvchi idoralar tomonidan ortiqcha kuch-vosita ishlatilgan yoki ishlatilmaganligi hamda inson huquqlarining buzilishi bilan bog‘liq holatlar yuzasidan axborot berish so‘raldi», - deyiladi bayonotda.

Ma’lum qilinishicha, taqdim etilgan yakuniy statistik va tahliliy ma’lumotlar ochiqlanishi bilan Mustaqil komissiya tomonidan jamoatchilikka xabar beriladi.