Ekologiya va iqlim oʻzgarish qoʻmitasi Toshkent viloyati Boʻstonliq tumani hududida daraxtlar qoʻporib tashlangani haqida tarqalgan xabar yuzasidan munosabat bildirdi.
Holat yuzasidan Toshkent viloyati Ekologiya va iqlim oʻzgarishi bosh boshqarmasi va Boʻstonliq tuman boʻlimi Ekopolitsiya xodimlaridan iborat ishchi guruh tuzilib, voqea joyida oʻrganish ishlari olib borilgan.
Oʻrganish davomida «Gʻazalkent» MFY hududda «Y.D.» MCHJ tomonidan 2 gektar yer maydonida jami 586 tup (shundan qimmatbaho 9 tup doʻlana, 3 tup archa, kam qimmatli 3 tup togʻ olchasi, 571 tup uchqat) daraxt noqonuniy ravishda ildiz qismi bilan qoʻporib tashlangani aniqlangan.
Xabarda holat yuzasidan tadbirkorga bir necha bor murojaat qilingani, ammo tadbirkor qonuniy talabga boʻysunmay, qarshilik koʻrsatishga uringani taʼkidlangan.
«Ayni damda Ekopolitsiya tomonidan huquqbuzarlikka chek qoʻyildi. Maxsus texnikalar yordamida tuproq ostida qolgan daraxtlar chiqarib olinib, tabiatga yetkazilgan zarar hisoblandi. Unga koʻra, qonunbuzarlik natijasida jami 1 milliard 705 million 660 ming soʻm zarar yetkazilgani hisoblandi», – deyiladi qoʻmita xabarida.
Holatga huquqiy baho berish va tegishli chora koʻrish maqsadida toʻplangan hujjatlar huquqni muhofaza qilish organlariga yuboriladi.
