Inson qadriga farg‘onacha "munosabat": Shifokorlar va bemorlarning kuni choyxona binosiga qoldi
|16:10 / 17.12.202212 4187 min
Farg‘ona viloyati Rishton tumani “Qayrag‘och” MFYdagi oilaviy shifokorlik punkti ikki yildirki choyxona binosida faoliyat ko‘rsatadi. Holati abgor bo‘lgan tibbiyot maskani 2020 yil aprel oyida qishloqdagi choyxonalardan biriga vaqtincha ko‘chirilgan edi. Yangi bino foydalanishga topshirilishida kechikishlar sabab aholi aziyat chekmoqda.
Ma’lum bo‘lishicha, tenderda g‘olib bo‘lgan “Universal Proekt Servis” xususiy korxonasi tomonidan Oilaviy shifokorlik punktida kapital ta’mirlash ishlari boshlangan.
Bino 2021 sentabr oyida foydalanishga topshirilishi kerak edi. Lekin binoda ishlar chala tashlab ketilgan.
Tabibning o‘zi bemor...
“Hozirgi ishlayotgan joyimiz aslida choyxona binosi bo‘lgan. Avariya holatiga kelib qolgan binoda qurilish boshlangan paytda choyxonaga ko‘chib o‘tdik.
Madiboboyeva Mastura, hamshira
Shu yil ikkinchi yil shu binoda qishlashimiz. Kasal bo‘lmagan xodimlar qolmadi. O‘zim ham majburlikdan ishlayapman. Boqa-chaqani boqish kerak-ku. Tepadan ish talab qilishadi. Noilojlikdan sovuq xonada o‘tiramiz. Qishlog‘imiz katta. 5 300 nafar aholiga xizmat ko‘rsatamiz. Jami 22 xodim ishlaydi.
2 yil deganda yangi bino qurib bitkazildi. Nima sababdan ko‘chmayapmiz, bilmayman. Bino bitgach, tozalab ham keldik. Isitish tizimida muammo bor deyishdi”, – deydi OShP hamshirasi Mastura Madiboboyeva.
Oilaviy shifokorlik punkti o‘t yoquvchisi G‘ayratjon Hakimov quruvchi tomonidan ishlar chala tashlab ketilganini ta’kidladi.
“Avvalgi qishloq vrachlik punkti yaroqsiz holga kelgan edi. 2020 yilda buzilib yangisi quriladigan bo‘ldi. Ustalar kelib qurilish ishlari boshlandi ham. Lekin bino bitgani bilan juda ko‘p muammolari bor. Ko‘p ishlar chala qolib ketdi.
Mavzuga oid
Kelayotgan bemorlarga xizmat ko‘rsatish juda qiyin. Qish payti “svet” yo‘q. berayotgan ko‘mirlari juda sifatsiz. Ilojsizlikdan tuproqqa o‘xshagan ko‘mirga suv aralashtirib yoqyapmiz.
Hamshiralar yangi binoni tezroq bitirib, choyxona binosidan ko‘chirib berishlarini so‘rab bormagan joylari qolmadi. Qurilgan yangi binoda muammo to‘la. “Kotyol”ni yoqsangiz, isiydi deyishdi. Lekin bu isitish tizimi ishlamayapti,” – deydi G‘ayratjon Hakimov.
“Tuman poliklinikasi uzoq, qishloq tibbiyot muassasasida esa sharoit yo‘q” – Qulpiniso Yusupova
Qulpiniso Yusupova, mahalla fuqarosi
“Hamshiralarimiz ikki yildirki choyxona binosida kasallarni davolab kelishyapti. Yaqinda turmush o‘rtog‘im bu yerga kelib davolanib shamollash kasalini orttirib ketdi. Bino sovuqligidan uydan ko‘rpa-to‘shak olib kelib ukol qildirib ketayotgan edik. Endi esa yo‘tal bo‘lib yotib qoldi. Choyxona o‘rnida o‘tirgan hamshiralarga juda qiyin. Hamshiralar og‘ir sharoitda ishlashga majbur bo‘lyapti. Tuman markazidagi poliklinikaga borish uzoqlik qiladi. Pensiyaga yashasak o‘zi. Ortiqcha xarajat og‘irlik qiladi”, – deydi u.
“Rahbarlar murojaatlarimizga e’tibor qaratishmayapti” – Aziza Begmatova
Aziza Begmatova
“Rahbarlardan tezroq yangi binoni bitirib berishlarini so‘raymiz. Sovuq kunlarda qiynalib ketdik. Osma ukol olgunimizcha sovqotib ketyapmiz. Yangi bino bitganiga bir yildan o‘tdi. Aholining chiqmagan joyi qolmadi. Biz aytganimiz bilan murojaatlarimizni rahbarlar inobatga olishmayapti. Mana bugun ukol olishga keldim. Muolaja xonalari bemor bilan to‘lgan.
Sovuq kunda bemorlar joy bo‘shatishini kutib tashqarida kutib turibmiz. Yangi binoda kutish joyi bor. Ichkariga kirib navbatimiz kelishini kutib o‘tiramiz”, – deydi u.
Rishton tumani Tibbiyot birlashmasi muhandisi Bahodir Ahmadjonov muammolar tez orada bartaraf qilinishi, oilaviy shifokorlik punktini bir hafta ichida yangi binoga ko‘chirishga va’da berdi.
Bahodir Ahmadjonov
“Qishloq vrachlik punkti 2021 yilda yangidan qurildi. Bino bitgandan keyin elektr toki bilan bog‘liq muammo yuzaga keldi. 3 fazali tok 500 metr masofadan tortib kelinishi kerak edi. Binoga elektr tarmog‘i tortish ishlari qurilish firmasi smetasiga kiritilmagan ekan. Shu sababli foydalanishga topshirilishi ancha kechikdi.
Elektr ta’minoti bo‘yicha yordam so‘rab hokimiyat va elektrosetga murojaat qildik. Quruvchi o‘z yonidan kabel olib keldi. Muammo deyarli hal bo‘ldi. Lekin aynan elektr ta’minoti sabab bino foydalanishga topshirilishi 1 yilga cho‘zilib ketdi.
Endi tok bor, binoni isitish esa muammoga aylandi. Biz yana bu borada hokimiyatga murojaat qildik. Barcha muammolarni bartaraf qilib, bir hafta ichida yangi binoga ko‘chib o‘tamiz”, – deydi u.
Oilaviy shifokorlik punktining yangi binosi
Holat bo‘yicha izoh olish “Universal Proekt Servis” qurilish tashkiloti ish boshqaruvchisi Abbosxon Mahmudov bilan telefon orqali bog‘landik. U bino qurib foydalanishga topshirilganiga 2 yil bo‘lgani, shu davr mobaynida tibbiyot muassasasiga elektr toki tortib kelish ishlarida yordam so‘rab tuman hokimligi, prokuratura, tuman elektr tarmoqlari korxonasiga murojaat qilingani, lekin mutasaddilar va’dasini bajarmaganini aytdi. Quruvchining qo‘shimcha qilishicha, binoga elektr ta’minoti tortib kelishda kechikish bo‘lgani sabab muammolar kelib chiqqan.
Rishton tumani hokimining qurilish ishlari bo‘yicha o‘rinbosari Nozimxo‘ja Oripovning Kun.uz muxbiriga ma’lum qilishicha, tibbiyot muassasasiga elektr tarmog‘i tortish ishlari smetaga kiritilmagani sababli masala yuzasidan tortishuvlar bo‘lgan. Bundan tashqari quruvchi ta’mirlash ishlarini cho‘zib yuborgan. Hokimiyat tomonidan 18 million so‘m mablag‘ ajratilgandan so‘ng binoga elektr tarmog‘i tortib kelingan.
Maqola tayyorlanishi jarayonida Rishton tumani tibbiyot birlashmasi rahbariyati tomonidan oilaviy shifokorlik punktiga isitish uskunalari olib borilgani, yangi bino bugun 17 dekabr kuni foydalanishga topshirilishi ma’lum bo‘ldi.
