Bojxona orqali ikki yo‘lakli tizimni qo‘llash tartibiga o‘zgartirish kiritiladi

Vazirlar Mahkamasining “O‘zbekiston bojxona chegarasi orqali o‘tkazish punktlarida ikki yo‘lakli tizimni qo‘llash tartibi to‘g‘risidagi nizomni tasdiqlash haqida”gi qaroriga o‘zgartirish va qo‘shimchalar kiritish to‘g‘risida”gi qarori loyihasi e’lon qilindi.

Xalqaro aeroportlar orqali uchib ketayotgan yo‘lovchilarni zamonaviy texnologiyalardan foydalangan holda maxsus ajratilgan joylarda masofaviy vizual kuzatuvni amalga oshirish orqali bojxona nazorati va rasmiylashtiruvidan o‘tkazishni ta’minlaydigan “Masofaviy bojxona nazorati” tizimi joriy etilgani sababli, xalqaro aeroportlar uchib ketish yo‘nalishida ikki yo‘lakli tizim bekor qilinmoqda. Ushbu tizim “Samarqand xalqaro aeroporti”da joriy etilgan.

“Masofaviy bojxona nazorati” tizimi orqali nazorat qilinayotgan jismoniy shaxslar va ular qo‘l yuklari bojxona nazoratidan o‘tkazilmasligi, faqatgina huquqni muhofaza qiluvchi organlardan kelib tushgan ma’lumotlar asosida tekshirilishi tartibi belgilanmoqda.

Bunda, aviatsiya xavfsizligi xizmati tomonidan jismoniy shaxslar va ular qo‘l yuklari tekshiriladi va bojxona rasmiylashtiruvi uchun alohida joylar tashkil etiladi.

Masofaviy bojxona nazorati tizimi tashkil etilgan xalqaro aeroportlar yo‘lovchilar harakatlanadigan zallariga talablar va jismoniy shaxslar masofaviy bojxona nazoratidan o‘tish tartibi, ikki yo‘lakli tizim joriy etilmagan chegara bojxona postlarida jismoniy shaxslar bojxona nazorati va rasmiylashtiruvidan o‘tish tartibi tasdiqlanmoqda.

Hujjat loyihasi qabul qilinishi natijasida jismoniy shaxslar va ular qo‘l yuklarini inson omilisiz “masofaviy bojxona nazorati” tizimi orqali bojxona nazoratidan o‘tkazilishi huquqiy asosi yaratilishiga, soddalashtirilgan bojxona tartibotlari joriy etilishiga erishiladi.