Germaniyada konslager sobiq kotibi ikki yillik sinov muddatiga hukm qilindi

Germaniyaning Itsexo shahri tuman sudi 20 dekabr, seshanba kuni Shtuttxof konslagerining sobiq kotibini ikki yillik sinov muddatiga hukm qildi. Sudyalar 97 yoshli sudlanuvchi Irmgard F. 1943 yildan 1945 yilgacha 10 000 dan ortiq odamni o‘ldirishda sherik bo‘lganini aniqladi. Sud prokuror talabini qanoatlantirdi. Himoya tomoni oqlov hukmini talab qildi. 

«Ayblanuvchiga bir necha ming qotillikka yordam bergani uchun hukm chiqarildi», dedi advokat Xans-Yurgen Forster. U konslagerda omon qolgan to‘rt kishiga birgalikda da’vogar sifatida himoya qilgan. Uning fikricha, «davlat jinoyat qonuni bundan ortiq narsani qila olmaydi». 

Irmgard F. ustidan sud jarayoni 2021 yil 19 oktyabrda boshlangan. Ayol 30 sentabr kuni sudga kelishi kerak edi, ammo ayblanuvchi kelmagani uchun majlis qoldirildi. Sud uni hibsga olish uchun order berdi. Ayblanuvchi o‘zining yakuniy bayonotida aytganidek, u «bo‘lib o‘tgan hamma narsadan va o‘sha paytda u Shtuttxofda bo‘lganidan afsusda».

1943 yil iyunidan 1945 yil apreligacha Irmgard F. konslager komendaturasida kotib bo‘lib ishlagan va boshqa ishlar qatori bevosita komendant Pol-Verner Xoppe bilan birga faoliyat yuritgan. Keyinchalik, Xoppe 1950-yillarda sudlangan, Germaniyada bir necha yil qamoqda o‘tirgan, shundan keyin muddatidan oldin ozod qilingan. 

Ushbu sud jarayoni - bugungi Germaniyadagi yagona shunday sud emas. 2020 yil iyul oyida Hamburgda Shtuttxofning sobiq qo‘riqchisi Bruno D. sudlangan edi, hukm o‘qilgan paytda u 93 yoshda bo‘lgan.