«Eski Captiva o‘rniga yangi Equinox» – Qashqadaryo viloyati hokimligi xizmat mashinalari haqida

Ukrainada boshlangan urush ortidan O‘zbekiston ham xarajatlarini maqbullashtira boshladi. Shavkat Mirziyoyev hudud va tarmoq xarajatlarini 10 trln so‘mga qisqartirishni aytgan, 2022 yil oxirigacha davlat organlariga avtomobil xarid qilishni qat’iyan taqiqlangandi. Ammo shuncha gaplardan keyin ham Qashqadaryo viloyati hokimligi 450 million so‘mga Equinox xarid qilish uchun shartnoma imzolagan.

{Yii::t(}

O'tkazib yuborish 6s

O'tkazib yuborish

Qalovini topib, qorniyam yoqishning hadisini olgan hokimlik taqiqni aylanib o‘tishning chorasini ham topgan. Qanday qilib deysizmi? Viloyat hokimi o‘rinbosari minib yurgan Captiva xizmat mashinasi Chiroqchi tumani hokimligiga «hadya qilingan». O‘z navbatida, Chiroqchi tumani hokimligi balansida bo‘lgan xizmat mashinasi yangi tashkil etilgan Ko‘kdala tumani hokimligiga «beg‘araz» berilgan.

Equinox eski Captivaʼsini tuman hokimligiga tuhfa qilgani uchun mashinasiz qolgan viloyat hokimi o‘rinbosari – investitsiyalar va tashqi savdo boshqarmasi boshlig‘i O‘tkirjon Qodirov uchun olinyapti.

Viloyat hokimligining hotamtoyligi ham bejiz emas aslida. Nega endi boshqalarga emas, aynan Chiroqchi tuman hokimligiga «beg‘araz» avtomobil ajratilgani tuman hokimi lavozimiga tayinlangan Nodir Erkayev bilan bog‘liq. Chunki u 2019-2022 yillarda viloyat hokimining moliya-iqtisod masalalari bo‘yicha birinchi o‘rinbosari bo‘lib ishlagan.

Endi viloyat hokimligi garajiga qaytamiz.

Hokimlik tasarrufida 15 ta avtomashina mavjud. Shundan:

• 2 ta Toyota Land Cruiser;
• 1 ta Trailblazer;
• 2 ta Tracker;
• 2 ta Captiva;
• 4 ta Gentra;
• 1 ta Nexia-3;
• 1 ta Damas;
• 1 ta Equinox.

Viloyat hokimining o‘rinbosari – investitsiyalar va tashqi savdo boshqarmasi boshlig‘i O‘tkirjon Qodirov uchun sotib olinayotgan, allaqachon puli ham to‘lab bo‘lingan avtomobil ham yetib kelsa, hokimlik balansidagi Equinox’lar soni ikkitaga yetadi.

Ma’lum bo‘lishicha, Ikkita Toyota Prado yo‘ltanlamasining biridan Qashqadaryo hokimi Murodjon Azimov foydalanadi. Ikkinchisi esa viloyat hokimining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari Alisher Qodirovga biriktirilgan.

Qashqadaryo viloyati hokimining yana 8 nafar o‘rinbosari bor. Hokimning sanoatni rivojlantirish, kapital qurilish, kommunikatsiyalar va kommunal xo‘jalik masalalari bo‘yicha o‘rinbosari Murodullo Azizovga Equinox, qishloq va suv xo‘jaligi masalalari bo‘yicha birinchi o‘rinbosari Ulug‘bek Uzoqovga Trailblazer, jamoat va diniy tashkilotlar bilan aloqalar bo‘yicha o‘rinbosari Ilhomjon Arziqulovga Tracker, yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha o‘rinbosari Anvar Qobilov hamda jamoatchilik bilan ishlash bo‘yicha maslahatchisi Dolli Allayevga Captiva, hokimning turizm, madaniyat, madaniy meros va ommaviy kommunikatsiyalar masalalari bo‘yicha o‘rinbosari Alisher Zokirov hamda viloyat hokimi matbuot kotibi Ahror Sodiqovga Gentra avtomobillari ajratilgan.

Shuningdek, hokim o‘rinbosari – oila va xotin-qizlar boshqarmasi boshlig‘i Komila Karamovaga Tracker, hokimning mahalliy sanoatni rivojlantirish masalalari bo‘yicha yordamchisi Nodirbek Hamroyevga Nexia-3, viloyat nuroniylarni qo‘llab-quvvatlash boshqarmasi boshlig‘i hamda Murodjon Azimovning nuroniylar masalalari bo‘yicha maslahatchisiga bir xilda Gentra avtomobillari xizmat mashinasi sifatida biriktirilgan.

Viloyat hokimligi balansidagi 15 ta xizmat avtomobili 2015-2021 yillar davomida xarid qilingan. Avtomobillarning eng eskisi olinganiga 7 yil, eng yangisiga 1 yil bo‘lgan.

Hokimlik saytida 2022 yilning o‘tgan davrida tasarrufdagi xizmat mashinalarining yonilg‘i-moy, ta’mirlash va boshqa xarajatlari uchun qancha mablag‘ sarflanganiga oid ma’lumotlarni topib bo‘lmadi. Avvalgi tahlillarda prezidentning ochiqlikka doir farmoni talablariga ko‘ra bu ma’lumot davlat organlarining saytlarida joylashtirib borilishi kerakligi haqida ma’lumot berilgandi.

Ochiq manbalarga ko‘ra, Qashqadaryodagi Mirishkor tumani hokimligi balansida 10 ta xizmat mashinasi bor. Viloyatdagi qolgan tuman va shahar hokimliklari ixtiyorida mavjud xizmat avtomobillari haqidagi ma’lumotlar ham ularning saytlaridan topilmadi. Viloyat hokimligi ochiqlik borasida ancha ilg‘or, afsuski, Qashqadaryodagi tuman va shahar hokimliklari haqida bunday deb bo‘lmaydi. Buni nazorat qilishi kerak bo‘lgan idoralar esa jim.

Jamshid Niyozov, jurnalist
Tasvirchi va montaj ustasi: Abdusalim Abduvohidov