Moliya vaziri: “Davlat tashkilotlarining qisqarishidan bo‘shaydigan budjet mablag‘lari ijtimoiy masalalarni hal etishga yo‘naltiriladi”

Senat yig‘ilishida ishtirok etayotgan Kun.uz muxbirining xabar berishicha, moliya vaziri Temur Ishmetov o‘z ma’ruzasida 2023 yilgi davlat budjetida hukumat organlarining qisqarishi hisobga olinganmi, degan masalaga izoh berib o‘tgan.

Temur Ishmetovga ko‘ra, davlat tashkilotlarining qisqarishidan bo‘shaydigan budjet mablag‘lari ijtimoiy masalalarni hal etishga yo‘naltiriladi:

“Xabaringiz bor, prezident farmoni bilan 2023 yil 1 yanvardan mustaqil faoliyat yurituvchi respublika ijro etuvchi hokimiyat organlari soni 61 tadan 28 tagacha, jumladan, amaldagi 25 ta vazirlik 21 tagacha qisqartirildi. Tabiiyki, muhokama qilinayotgan “2023 yil uchun Davlat budjeti to‘g‘risida”gi qonun loyihasida mazkur islohotlar hisobga olinganmi, degan savol tug‘iladi. Ta’kidlash joizki, ushbu farmon ijrosini ta’minlash uchun qayta tashkil etilayotgan respublika ijro etuvchi hokimiyat organlari faoliyatini to‘laqonli yo‘lga qo‘yish chora-tadbirlari asosida ularning tuzilmalari, vazifa va funksiyalarini aniq belgilovchi normativ xujjatlar tayyorlanmoqda. Ular tasdiqlangandan so‘nggina respublika ijro etuvchi hokimiyat organlarining saqlash xarajatlariga aniqlik kiritilib, belgilangan tartibda qonunga o‘zgartirish va qo‘shimchalar kiritiladi. Bunda shu islohotlar natijasida bo‘shaydigan budjet mablag‘lari prezident topshirig‘iga asosan ijtimoiy masalalarni hal etishga yo‘naltiriladi”.