Jeep birinchi marta Yevropada «Yil avtomobili» bo‘ldi

Jeep Avenger ixcham krossoveri 156 ot kuchiga ega elektr dvigatel bilan jihozlangan, batareyasi 400 km gacha masofani bosib o‘tishni ta’minlaydi.

Foto: Jeep

«Yil avtomobili» Yevropa tanlovining tashkiliy qo‘mitasi Bryussel avtosalonida hakamlar hay’ati tomonidan ovoz berish natijalarini e’lon qildi. Unga ko‘ra, Jeep Avenger ixcham krossoveri Yevropada 2023 yil avtomobili deb tan olindi.

Hakamlar hay’atining 57 a’zosi tomonidan ovoz berish natijalariga ko‘ra, Avenger 328 ball to‘pladi. Ikkinchi o‘rinni Volkswagen ID.Buzz elektr krossoveri, uchinchi o‘rinni Nissan Ariya egalladi. Undan keyingi o‘rinlarda Kia Niro, Renault Austral, Peugeot 408, Subaru Solterra va Toyota bZ4X.

«Yil avtomobili» hakamlar hay’ati Yevropaning 22 davlatida faoliyat yurituvchi 57 nafar jurnalistdan iborat. Tanlov 2023 yilda 60 yoshga to‘ladi. Stellantis konserniga tegishli Jeep brendi o‘z tarixida birinchi marta «Yil avtomobili» tanlovida g‘oliblikni qo‘lga kiritdi, deyiladi tanlov tashkiliy qo‘mitasi xabarida.

Avenger - ixcham krossover (uzunligi 4 m), u 156 ot kuchiga ega elektr dvigatel bilan jihozlangan, batareyasi 400 km gacha masofani bosib o‘tishni ta’minlaydi. Yevropada uning qiymati 40 ming yevrodan boshlanadi.