Dunyodagi eng keksa ayol 118 yoshida vafot etdi

Fransiyalik Lyusil Randon ikkita jahon urushi va pandemiyadan omon chiqqandi - u hatto kovid bilan kasallangan. Endi 115 yoshli ispaniyalik ayol Yer yuzidagi eng keksa odamga aylandi.

Lyusil Randon / Foto: le monde

118 yoshli fransiyalik Lyusil Randon 17 yanvar, seshanba kuni vafot etdi. U sayyoradagi eng keksa ayol edi. «Bu juda achinarli, lekin u sevikli akasi bilan uchrashishni xohladi. Uning uchun bu ozodlik», - deya so‘nggi yillarda Randon yashagan qariyalar uyi vakilidan iqtibos keltirgan AFP.

1904 yil 11 fevralda Fransiya janubida tug‘ilgan Lyusil Randon ikki jahon urushidan, ispan grippi pandemiyasidan va COVID-19'dan omon chiqqandi. U hatto 2021 yilda koronavirus bilan kasallangan, ammo kasallikni yengil o‘tkazdi va eng keksa odamning koviddan tuzalishi bo‘yicha rekord o‘rnatdi.

So‘nggi yillarda Lyusil Randonning ko‘zlari zaiflashgan va u nogironlar aravachasida harakatlangan. Ammo u 108 yoshga to‘lgunga qadar monastirda ishlashni davom ettirdi. Randonning o‘limidan so‘ng, Mariya Branyas Morera dunyodagi eng keksa odamga aylandi. Ispaniyalik ayol 1907 yil 4 martda tug‘ilgan, hozir u 115 yoshda.