Angliyada rekord yangilandi. Transferlarning so‘nggi kuni kim qayerga o‘tishga ulgurdi?
|18:03 / 01.02.202344 70920 min
Angliyaning qator top-klublari yangi xaridlarga ulgurishdi, «PSJ» ulgurmadi. Transferlarning so‘nggi kunidagi voqealar.
Yevropada qishki transferlar oynasi yopildi.
«Arsenal» Jorjinoni safiga qo‘shib oldi
«Arsenal» «Chelsi»dan 31 yoshli yarimhimoyachi Jorjinoni transfer qildi. Tomonlar 10 million funtga kelishishgan (2 mln funtlik bonuslar ham ko‘zda tutilgan). Futbolchi bilan 2024 yil yoziga qadar shartnoma tuzilgan, muddat yana bir yilga uzaytirilishi mumkin. Jorjino yangi klubida 20-raqamli futbolkada to‘p suradi.
Bu qishning eng kutilmagan transferlaridan biri bo‘ldi. Joriy mavsumda chempionlik uchun kurashayotgan Arteta jamoasi maydon markazida yangi futbolchiga ehtiyoj sezayotgandi. «Arsenal»da ayni vaqtda tayanch yarimhimoyasida Chaka va Parti juftligi harakat qiladi. Ammo ulardan biri o‘ynay olmaydigan taqdirda, bu pozitsiyada o‘ynaydigan boshqa futbolchi yo‘q. Ishonchni oqlay olmagan yosh Sambi Lokonga «Kristal Pelas»ga ijaraga berildi (shuningdek, Suaresh «Fulhem»ga, Markinos «Norvich»ga ijaraga berilgan), Muhammad Al-Neni esa jarohat olgan. Londonliklar bu muammoni hal qilish uchun uzoq vaqt davomida «Brayton» futbolchisi Moyses Kaysedo uchun kurash olib bordi - ammo jamoaning qator takliflari rad etildi - «Brayton» bu futbolchisini 70 mln funtga ham sotishga rozi bo‘lmadi. Natijada e’tiborini Jorjinoga qaratgan «kanonirlar» kerakli pozitsiyani katta bo‘lmagan mablag‘ evaziga yopa oldi. Qolaversa, Jorjino hujumda ham faol harakat qiladi - Arteta uni o‘z o‘yin uslubiga mos futbolchi deb topgan.
Futbolchining so‘zlariga ko‘ra, «Arsenal» bosh murabbiyi Mikel Artetaning ishtiroki transferda hal qiluvchi omil bo‘lgan: «Men Arteta avval ham bir necha marta meni jamoasiga qo‘shib olishni xohlaganidan xabardor edim, lekin men buni istamagani tufayli emas, boshqa turli sabablarga ko‘ra bu ro‘y bermayotgandi. Albatta, u bu transferga katta ta’sir ko‘rsatdi».
Italiyalik yarimhimoyachi 2018 yildan buyon «Chelsi» safida o‘ynab kelayotgandi. Ko‘klar jamoasida Jorjino jami 213 o‘yinda maydonga tushib, 29 gol urgan va 9 golga uzatma bergan. U «Chelsi» bilan Yevropa Ligasida, Chempionlar ligasida va UYeFA Superkubogini qo‘lga kiritgan, shuningdek klublar o‘rtasidagi jahon chempionatida g‘olib chiqqan.
Enso Fernandes «Chelsi»ga o‘tdi
«Chelsi» «Benfika» bilan 22 yoshli Enso Fernandes transferi bo‘yicha kelishuvga erishdi. Transfer qiymati 120 million yevroni tashkil etadi. Fernandesning London klubiga o‘tishi APL uchun rekord darajadagi transferga aylandi (bunga qadar bu borada birinchi o‘rinda «Aston Villa»dan «Manchester Siti»ga 117 million yevro evaziga o‘tgan Jyek Grilish turgandi) va futbol tarixidagi eng qimmatbaho xaridlar oltiligiga kirdi (2019 yilda Joau Felish «Benfika»dan «Atletiko»ga 127,2 mln yevro evaziga, 2018 yilda Koutino «Liverpul»dan «Barsa»ga 135 mln yevro evaziga, Usmon Dembele 2017 yilda «Borussiya» Dortmunddan «Barsa»ga 140 mln yevro evaziga, 2017 yilda Mbappe «Monako»dan «PSJ»ga 180 mln yevro evaziga, 2017 yilda Neymar «Barsa»dan «PSJ»ga 222 mln yevro evaziga transfer bo‘lgan).
Mavzuga oid
Argentinalik yarimhimoyachi «Benfika»ga 2022 yil yozida «River Pleyt»dan 10 mln yevro evaziga transfer qilingandi (Argentina klubi keyingi transferdan 25 foizlik ulushga ega bo‘ladi). O‘tgan yarim mavsumda futbolchi portugallar jamoasida 29 o‘yinda maydonga tushib, 4 gol urgan va 7 assist amalga oshirgan.
Dekabr oyida ushbu yarimhimoyachi terma jamoa bilan jahon chempioniga aylangandi. Qatardagi turnir yakunida u eng yaxshi yosh futbolchi sifatida taqdirlangandi. «Chelsi»da Jorjino ketgach, maydon markazida raqobat kamaygan. Lekin yosh futbolchi yangi jamoaga moslashishi uchun ma’lum vaqt talab etiladi.
Zabitser — «MYu»da
«Manchester Yunayted» o‘z saytida «Bavariya»dan yarimhimoyachi Marsel Zabitserni transfer qilganini e’lon qildi. Angliyaliklar klubi 28 yoshli avstriyalikni mavsum oxiriga qadar ijaraga olgan. «Qizil iblislar» Kristian Eriksen jarohat olgach («MYu»ning uyg‘onishida katta hissa qo‘shgan daniyalik futbolchi may oyiga qadar o‘ynay olmasligi mumkin), maydon markazida uning o‘rnini bosa oladigan futbolchiga ehtiyoj sezayotgandi. Zabitser tayanch zonasida ham, oldingi chiziqda ham kuchli pressing uyushtira oladigan futbolchidir.
Zabitserning myunxenliklar klubi bilan shartnomasi 2025 yil yoziga qadar tuzilgandi. Ammo u 2021 yilda «Leypsig»dan «Bavariya»ga kelgach, kuchli raqobat tufayli asosiy tarkibga kira olmadi - uning pozitsiyasida Kimmih harakat qiladi. U asosan zaxiradan o‘yinga qo‘shilgan, oktyabr oyidan buyon boshlang‘ich tarkibda harakat qilmagan. Nagelsman uni jarohat olgan Goretska o‘rnida o‘ynatishga harakat qildi - ammo bu pozitsiya unga mos emasdi, qolaversa, «Bavariya» qanotlarda tezkor futbolchilarga tayanadi.
Joriy mavsumda Zabitser barcha turnirlar doirasida 24 o‘yinda maydonga tushib, 1 gol urdi va 1 golga uzatma berdi. U Avstriya milliy jamoasida 68 o‘yinda maydonga tushgan. Transfermarkt portali futbolchi transferini 20 million yevroga baholagan. Mavsum yakunlariga ko‘ra «MYu» uning transferini to‘liq sotib olish bo‘yicha yangi muzokaralarga kirishishi ham mumkin.
«Bavariya» «Manchester Siti» himoyachisi bilan kuchaydi
«Manchester Siti» himoyachisi Joau Kanselu mavsum oxiriga qadar «Bavariya»ga ijaraga berildi. Kelishuvga ko‘ra «Bavariya» mavsum oxirida ushbu portugaliyalik futbolchini 70 million yevroga sotib olish huquqiga ega bo‘ladi. Futbolchi nemislar klubida 22-raqamli futbolkada harakatlanadi.
Joriy mavsumda 28 yoshli Kanselu «shaharliklar» safida 17 o‘yinda maydonga tushib, 2 gol urdi va 1 assist amalga oshirdi. Qishda bosh murabbiy Pep Gvardiola bilan ziddiyatga borgan futbolchi «Manchester Siti»ning asosiy tarkibidagi o‘rnini yo‘qotdi.
Barchasi Kanselu jahon chempionatidan qaytgach boshlandi. O‘tgan vaqt ichida «Siti» 10 o‘yin o‘tkazdi, Joau esa faqat uch o‘yinda boshlang‘ich tarkibda maydonga tushdi, APL doirasida «Chelsi»ga qarshi o‘yinda (1:0) tanaffusda almashtirildi, Liga kubogida «Sauthempton»ga qarshi o‘yinda (0:2) to‘liq o‘ynadi, APLda «MYu»ga qarshi o‘yinda (1:2) to‘liq o‘ynadi. Ikki o‘yinda ikkinchi bo‘limlarda zaxiradan o‘yinga qo‘shildi - «Lids»ga qarshi APL o‘yini (1:0) va «Chelsi»ga qarshi Angliya Kubogi o‘yini (4:0).
Murabbiy uni odatiy chap qanotidan o‘ng qanotga o‘tkazdi (futbolchi doimiy ravishda murabbiy turadigan qanotda yugurdi va undan tanbehlar eshitib turdi). Uning qanotida esa murabbiy 18 yoshli Riko Lyuisni o‘ynatmoqda.
Navas «Nottinghem Forest»ga ijaraga berildi
Inglizlar klubi rasmiy saytida «PSJ»ning 36 yoshli darvozaboni Keylor Navas transfer qilingani haqida ma’lumot berildi. Kostarikalik posbon «Nottinghem Forest»da mavsum yakuniga qadar ijara asosida o‘ynaydi. Ayni vaqtda APLda 13-o‘rinda borayotgan bu jamoaning asosiy darvozaboni Din Henderson jarohat olib safdan chiqqan.
Joriy mavsumda Navas «PSJ»da Fransiya Kubogi doirasida ikki o‘yinda maydonga tushdi, chempionatda esa biror o‘yinda ishtirok etmadi. Transfermarkt portali futbolchi transferini 5 million yevroga baholagan.
Torgan Azar «PSV»ga o‘tdi
Dortmundning «Borussiya» klubi yarimhimoyachisi Torgan Azar mavsum oxiriga qadar ijara asosida «PSV» klubida to‘p suradi..
Niderlandlar klubida ushbu 29 yoshli futbolchi transfer huquqini sotib olish huquqi yo‘q.
Joriy mavsumda Azar «Borussiya» safida 21 o‘yinda maydonga tushib, bitta gol urgan. Transfermarkt uning transfer bahosini 9 million yevro etib belgilagan.
Qolgan transferlar
Mett Doerti («Tottenhem» – «Atletiko», erkin agent)
«Tottenhem»ning yana bir o‘ng qanot himoyachisi «Atletiko»ga o‘tdi. 31 yoshli Doerti Antonio Kontega keraksiz bo‘lib qoldi va maydonga shunchaki boshqa futbolchi yo‘qligi uchun tushayotgandi. Ammo londonliklar 45 mln yevroga Pedro Porroni sotib olishdi – va irlandiyalik futbolchiga javob berildi (bu «Atletiko» tarixidagi ilk irland futbolchi). Doerti bu klubga o‘tish oldidan «Tottenhem» bilan shartnomani bekor qildi. Avvaliga ijara masalasi muhokama qilinayotgandi, ammo «shporlar»da APLdan tashqarida ijaraga berilgan futbolchilar soni 8 nafarga yetib bo‘lgandi, bu esa FIFA qoidalariga ko‘ra maksimum miqdor edi.
Florian Toven («Tigres» – «Udineze», erkin agent)
2021 yilda ushbu fransuz «Tigres» safiga borib qo‘shilgandi, ammo uning Meksikadagi sarguzashtlari yakunlandi – u bu yerda ikki mavsum o‘ynadi. Yaqin vaqtlargacha «Marsel» safida ko‘plab gollar urgan Toven endi 30 yoshda. Fransuz bunga qadar Yevropaning boshqa ligasiga faqat bir marta chiqqandi – u 2015/16 yillar mavsumida «Nyukasl» a’zosi bo‘lgan, ammo bu yerda uning ishlari yurishmagandi.
Diyego Lorente («Lids» – «Roma», ijara)
Ispaniyalik futbolchi 2020 yil yozidan buyon «Lids»da o‘ynaydi, ammo Marselo Belsa ketgach, asosiy tarkib himoyachilari safidan chiqib qoldi (joriy mavsumda APLda atigi 8 o‘yin). Endi u Joze Mourino bilan ishlaydi – ushbu mutaxassis APLda o‘yin amaliyotiga ega bo‘lgan markaziy himoyachilarni afzal ko‘radi.
Hamid Traore («Sassuolo» – «Bornmut», 30 mln yevroga sotib olish huquqi bilan ijara)
APLga yana bir hujumkor yarimhimoyachi keldi. 22 yoshli ivuarlik to‘rtinchi yildirki barqaror o‘yin namoyish etmoqda va uni «Bornmut» o‘z safiga chaqirgani bejiz emas. Shu bilan birga, yosh bo‘lishiga qaramay, Traore kuchli o‘sishga erishmayapti, ayniqsa bu mavsumda uning natijalari pasaygan – A Seriyada 11 o‘yinda 3 assist.
Terem Moffi («Loryan» – «Nitssa», 30 mln yevroga sotib olish huquqi bilan ijara)
23 yoshli nigeriyalik forvard «Loryan»ning eng yaxshi to‘purari edi (18 o‘yinda 12 gol, Liga 1 da bu borada faqat Mbappe undan oldinda). U yuqori tezlikka ega taran forvard sanaladi.
Harri Suttar («Stok» – «Lester», 17 mln yevro)
Transfer shunisi bilan qiziqarliki, «Lester», aftidan, Suttarga 2022 yilgi jahon chempionatidagi o‘yinlari tufayli qiziqib qolgan – 24 yoshli avstraliyalik markaziy himoyachi Qatardagi turnirda to‘pni uzoqlashtirish va havodagi duellarni yutish bo‘yicha eng yaxshi natija qayd etgandi. Buning hayron qoladigan joyi yo‘q, chunki u 198 sm bo‘yga ega. U «Stok» safida Chempionshipning 2022/23 yilgi mavsumida faqat 7 o‘yinda maydonga tushgandi.
Jonjo Shelvi («Nyukasl» – «Nottinghem Forest», 8 mln yevro)
«Liverpul»ning sobiq futbolchisi va «Nyukasl»da ko‘p yillar yetakchi bo‘lgan Shelvi bu mavsumda boshlang‘ich tarkibda o‘ynamay qo‘ydi va APLda faqat uch o‘yinda qatnashdi – uni «Nyukasl» fanatlari nafaqat taqirboshi uchun, balki yetti yil davomidagi sadoqati uchun ham qadrlashadi (klub Chempionshipga tushib ketganida ham u jamoada qolgandi). Ammo u hali 30 yoshda – va Jonjo zaxira o‘rindig‘ida o‘tirmoqchi emas. Shu tufayli «Forest»ga yo‘l oldi.
Ilya Zabarniy («Dinamo» Kiyev – «Bornmut», 22,5 mln yevro)
Yevropaning kuchli ligalarida yana bir ukrainalik paydo bo‘ldi – aftidan, Ukraina termasida kuchli avlod yetilib kelmoqda. APLning o‘zida to‘rtinchi ukrainalik futbolchi – bungacha Zinchenko («Arsenal»), Mikolenko («Everton») va Mudrik («Chelsi») Angliyaga kelgandi. Markaziy himoyada o‘ynaydigan Zabarniy hali 20 yoshda, u milliy jamoada 24 o‘yin o‘tkazib ulgurgan, unga Yevropa klublari kurash boshlagandi – u esa darhol APL klubiga o‘tib qo‘yaqoldi.
Felipe («Atletiko» – «Nottinghem Forest», 2,3 mln yevro)
33 yoshli markaziy himoyachi «Portu»dan «Atletiko»ga o‘tib, Ispaniyada 3,5 mavsum o‘ynadi – ammo so‘nggi yil uning uchun muvaffaqiyatsiz kechdi. Avval braziliyalik futbolchi doimiy ravishda maydonda bo‘lardi, 2022/23 yillar mavsumining birinchi qismida esa La Ligada atigi uch o‘yinda ishtirok etdi. Endi u APLda «Forest»ga yordam berishga harakat qiladi.
Filipp Maks (PSV – «Ayntraxt», ijara)
Chap qanot himoyachisi Niderlandiyada 2,5 yilni o‘tkazib, yana Germaniyaga qaytmoqda: 29 yoshda bo‘lgan Maksni «Ayntraxt» ijaraga oldi. U bir vaqtlar Germaniya milliy jamoasiga nomzod edi, ammo keyin uning faoliyatida jiddiy o‘sish ro‘y bermadi.
Ektor Bellerin («Barselona» – «Sporting», ijara)
Ektor Bellerin hamon «Barselona» a’zosi va yanvarda jamoada ikki o‘yin o‘tkazishga ham ulgurdi (Ispaniya Kubogida uchinchi liga jamoasiga qarshi o‘yinlar). Ektor hozir 27 yoshda. Mavsum oxiriga qadar u «Sporting»da o‘yin amaliyotiga ega bo‘lib, formasini tiklashi mumkin.
Pedro Porro («Sporting» – «Tottenhem», 45 mln yevro)
«Tottenhem» yanvar oyi boshidan buyon ushbu ispaniyalik lateralni safiga qo‘shib olish uchun harakat qilib kelayotgandi, ammo londonliklar uzoq vaqtgacha «Sporting» bilan narx borasida kelisha olmadi. U Konte tizimi uchun ideal futbolchi – uch markaziy himoyachi bilan o‘ynaladigan tizimdagi lateral.
Kamal Suleyman («Renn» – «Sauthempton», 25 mln yevro)
Ushbu ganalik vingerning to‘liq ismi – Kamaldin va u APL klublariga xos tipik (ko‘p o‘ylanmagan) investitsiyadir: kuchli beshlik ligalarida bir yarim mavsumda atigi 34 o‘yin o‘tkazgan futbolchi uchun 25 million yevro to‘lanmoqda. O‘tgan mavsumda Suleyman boshlang‘ich tarkibda deyarli o‘ynamagan, bu mavsumda esa maydonda o‘rtacha 20 daqiqa harakat qilmoqda. Lekin u mashhur Right to dream akademiyasi tarbiyalanuvchisi hisoblanadi.
Vitinya («Braga» – «Marsel», 32 mln yevro)
Fransiya chempionatida Vitinyalar soni yana bittaga ko‘paydi – 22 yoshli forvard «Braga»dan «Marsel»ga fransuz klubi uchun rekord summaga transfer qilindi. U faqat so‘nggi bir yarim mavsumda yuqori darajada to‘p surmoqda, ammo Portugaliya chempionatidagi 41 o‘yinda u «gol+pas» tizimida 14+4 ko‘rsatkichi qayd etgan (har ikki mavsumda 7+2, bu mavsum yarmidayoq o‘tgan mavsumdagi samaradorlik qayd etilgan). U Portugaliya terma jamoasining JCh-2022 uchun kengaytirilgan tarkibiga ham kiritilgandi, ammo yakunda turnirga olib ketilmadi.
Amalga oshmay qolgan transferlar
Ziyoshning «PSJ»ga transferi so‘nggi daqiqalarda barbod bo‘ldi
Insayder Fabritsio Romanoga ko‘ra, 29 yoshli yarimhimoyachi Hakim Ziyoshning «Chelsi»dan «PSJ»ga o‘tishi dedlayn arafasida bloklanib qolgan. Futbolchi tibbiy ko‘rikdan o‘tish uchun Parijga uchib bo‘lgandi, ammo tomonlar transfer bo‘yicha kelishishga ulgurishmadi. Dastlabki ma’lumotlarga ko‘ra — londonliklar klubining beparvoligi tufayli, ular hujjatlarni bir necha bor xatolik bilan yuborishgan.
CBS jurnalisti Ben Jyeykobsning xabar berishicha, bugun parijliklar bu masalada Fransiya ligasiga murojaat qilishga urinib ko‘rishadi, biroq muvaffaqiyat ehtimoli past.
Ziyosh «Chelsi» safida joriy mavsumda 15 o‘yinda maydonga tushib, 1 golga uzatma berdi. U dekabrda Marokash milliy jamoasi bilan Qatardagi jahon chempionatida 4-o‘rinni egallagandi. Transfermarkt uning transferini 20 million yevroga baholagan.
Ozmunning «Marsel»ga o‘tishi amalga oshmadi
«Bayyer» hujumchisi Sardor Ozmun «Marsel»ga o‘ta olmadi. Sport24 ma’lumotiga ko‘ra, fransuzlar klubi boshqa futbolchini afzal ko‘rishgani uchun ushbu transfer amalga oshmay qolgan.
Avvalroq 28 yoshli eronlik agar «Marsel»ga o‘ta olmasa, Rossiya chempionatiga qaytishi mumkinligi haqida xabarlar paydo bo‘lgandi.
Joriy mavsumda Ozmun barcha turnirlar doirasida 13 o‘yinda maydonga tushib, ikki golga hammualliflik qilgan.
